Ulloriaaqataavugut

Jens Mølgaard 2018-mi ilinniartitsisutut naammassivoq. Ilinniarfissuarnermini atuartitsinissaminut digitaalimik sakkussat arlallit ilikkarsimavai, soorlu filmit aallaavigalugit atuartitseriaaseq Flipped Classroom. Aallaqqaataaniilli Jensip paasisimavaa atuartitseriaaseq Flipped Classroom ingerlanniaraanni filmit atortussallu kalaallisoortut ullutsinnut naleqquttut amigaataasut. Taamaattumik aaliangersimavoq nammineq filmit sananiarlugit.

“Nammineerlunga filmit sananissaat ilinniarsimavara. Pitsaassusaat pitsanngoriartuinnarput. Youtube-mit isumassarsiortarpunga.”

Filmit nammineq atugassiat

Aallaqqaammut videoliani atuartuutiminut taamaallaat atortarsimagaluarpai, naak Jensip videoliai youtubemi takusariaannaagaluit. Ikinngutiminit suleqatiminillu kaammattorneqarnermi kingorna facebook aqqutigalugu quppersagaq “Ulloriaaqataavugut” sanasimavaa tamatumali kingorna siammarnera sukkasimaqaaq. Ullumikkut quppersakkap sananerata ukioq ataasinngornerata kingorna, quppersagaq inunnik 2.500-nik malinnaavigineqarpoq aammalu ilinniartitsisoqatiminit tusakulalersimallugu nammineq filmiliani atuartitsinermi atorneqartartut.Filmit ilisimatusarnermik siammasinnerusumik aallaaveqartarput. Soorlu filmiliaasa ilagaat Avataarsuup pinngornera, Atomit sananeqaatai Coronavirusilu. Filmiliami eqqortuunissaat pillugu sammisami nalunnginnittunik suleqateqartarsimavoq: soorlu avataarsua pillugu filmiliaani ulloriarsiooq qanimut suleqatigisimavaa taavalu Coronavirusip sananerani niviarsiap paasissutissat eqqortuunersut misissorsimallugit.

Flipped classroom

Jensip filmiliani atuartitsinerminut atoraangamigit, atuartitsinnginnermini filmiliani ullut arlallit sioqqullugit atuartuutiminut tunniuttarpai. Taamaalillutik atuartuutaasa ilinniagassarilertarpaat filmit iPadiminni isiginnaassallugit. Taamaalillutik atuartitsivissaminnut pigaangamik suliakkiissutigineqartut nalunngereertarpaat Jensillu piffissaq nassuiaanissaminut atortariaqanngilaa. Atuartuutaami nammineerlutik suliakkiissutit, ooqattaarutit misileraanerillu Jensip piareersareersimasai aallutilertarpaat.Taamaalilluni atuartitsineq illuatungaanut mumittutut ilineqartarpoq – atuartut piareersareersimallutik takkuttarput suliakkiissutigineqartorlu ingerlaannaq aallartissinnaasarlugu Jensilu ikiuinissaminut periarfissaqarnerulertarluni atuartitsissutissaminik nassuiaaqqaartariaqartannginnami. Atuartuutaasami aamma filmit takoqqittariaannaasarpaat, atuartitsinerup nalaani imaluunniit misilitsinnissap tungaanut uteqqiinertut atorlugit.

 

“Sunngiffinni filmiliornerusarpunga”

Jensip filmiliai suli takusimanngikkukkit uumap atuagassiap ataaniipput tuugassat filmilianut ingerlatseqqittitsisartut. Quppersagaq iserfigiguk Jensillu filmiliai isumassarsiorfigalugit.

”Ulloriaaqataavugut” uani takukkit:

Kan du lide nyheden?

Share on facebook
Del på Facebook
Share on twitter
Del på Twitter
Share on linkedin
Del på Linkdin
Scroll to Top