Uummannap nunaqarfiisa atuarfiini iPadeqalerneq

Kommunit suleqatigiillutik suliniutaannut Kivitsisamut atatillugu aggusti qaammat Uummannami Atuarfik Edvard Krusemi atuartut iPaditaarput. Nunaqarfiillu tullinnguussimapput.

Uummannami Atuarfik Edvard Krusemi ilinniartitsisuuvunga, atuartitsinermalu saniatigut atuarfimmi ikiortitut sulillunga. Ikiortitut suliassarivara Kivitsisap siunertaa suliffinni piviusunngortissallugu. Ilaatigut suliassaraara suleqatinnut atuartunullu atuartitsinermi
iPadip qanoq atorsinnaaneranik siunnersuissallunga, tassanilu Uummannap nunaqarfiisa atuarfii aamma ilaapput.

Septembarip aallartinnerani angallat Sisak IV-mut ilaallunga nunaqarfinnik tulleriiaarillunga angalavunga, nunaqarfinni kursusertitsisussat allat peqatigalugit.
Pingaarnertut ilinniartitsisut siunnersortussaasimavakka, kisianni nunaqarfiit ilaann atuartut aamma peqataapput.

Nunaqarfinnut angalaninnut atatillugu atuartunut iPadinik agguaaneq pivoq, nunaqarfiit ilaanni iPadinik agguaanerit uanga peqataaffiginngikkaluarlugit. Agguaanerni
peqataaffigisanni takusinnaasimavara iPaditaarneq nuannaarutigineqartoq alutorineqarlunilu.

Siunnersuininni nassuiaassivunga sooq atuarfinni iPaditaarnersugut – tassa atuartut ilikkarsartarnerat siuarsarniarlugu aammalu meeqqat atuarfianni angusarisartakkat qaffassarniarlugit. iPad atuartitsinerup iluani periarfissanik nutaanik tunisivoq. Ikiortitut
suleqatit siunnersorneqassapput qanoq iliornikkut atuartut nammineerlutik misissuillutillu pilersitsisinnaanerulersissinnaanerigut.

Saqqummiininni iPadip atornerani malittarisassat saqqummiuppakka aammalu qanoq ililluni atuartitsinermi iPadit atorluarneqarsinnaanersut. App-it assigiinngitsut
saqqummiuppakka misilerartillugillu. Ilaatigut saqqummiuppara app-eq Showbie, tassaasoq ilinniartitsisut atuartullu attaveqaqatigiiffigisinnaasaat. Tassani sulianik
ilioraasoqarsinnaavoq, ilinniartitsisullu atuartuutimi suliai utertitsiffigisinnaallugit.

Piffissaq annikittuinnaq atorlugu atuarfinnut siunnersuinera ingerlangaluartoq malugisinnaavara ilinniartitsisuniit iluarisimaarneqartoq. Angalanera
suleqatigiinnerulernissamut aallarniisuuvoq, qujanartumillu ilinniartitsisut atuartullu saqqummiiffikka ilikkajasoorujuupput saqqummiussannullu soqutiginnillutik.

Ilinniartitsisut nunaqarfiit akimorlugit suleqatigiilluarsinnaanerat angalaninni aamma ammaanneqarpoq, pissutigalugu nunaqarfinni taakkunani ilinniartitsisut tamarmik
Showbiemi Atuarfik Edvard Krusemi gruppetsinnut ilanngukkamik. Tassani fagit klassillu akimorlugit ikioqatigiilluartoqarsinnaavoq. Suliassat isumassarsiallu atorneqarsinnaasut
iliorarneqartarput aammalu nalornissuteqaraanni ajornanngitsumik aperisoqarsinnaalluni.

Maanna Uummannamut utersimalereerpunga. Nunaqarfinnut angalanera nuannerpoq, ilinniartitsisullu nunaqarfinniittut suleqatigilernissai qilanaaraara.
Takorloorsinnaavara iPadip atuarfimmi atorneqarnera sungiulluarneqarpat, periarfissarpassuit takkussuukkumaartut. Assersuutigalugu iPadiniik internet-eqarneq
periarfissarpassuarnik ammaassereerpoq. Sukkanerusumik nunarsuaq tamakkerlugu malinnaavigisinnaavarput aammalu ungasissumiittut attaveqaqatigilluarsinnaallugit.

Periarfissaalerumaarporlu illoqarfimmiik nunaqarfimmut imaluunniit nunaqarfimmiik nunaqarfimmut alimasissumik atuartitsineq, angalaqqaanngikkaluarluni. Tamanna fagini
assigiinngitsuni ilinniartitsisussaaleqinermut aaqqiissutaalluarsinnaavoq.
Atuarfimmi iPaditaarneq isumalluarnartorujuuvoq periarfissarpassuit ammaanneqartut
eqqarsaatigalugit – ilinniartitsisuunerlu nuannernerulersippaa. Tamanna ikiortitut suleqatinut paasitikkusunnarpoq.

Allattoq:
Nina Thygesen
Uummannami Atuarfik Edvard Krusemi Ikiorti

Kan du lide nyheden?

Share on facebook
Del på Facebook
Share on twitter
Del på Twitter
Share on linkedin
Del på Linkdin
Scroll to Top