Kivitsisami siuariarnikooqaagut. Atuartut 96 procentii maanna iPadeqalernikuupput atuarfinnilu amerlanerni internetseqarneq pitsaaanerulersinneqarnikuulluni kiisalu ikiortit ulluinnarni sulersuataartarput ilinniartitsisoqatitik ikiortarlugit, ilinniartillugit diqanoq iliorluni gitaliusumik periarfissat atuartut ilinnigaqarnissaasa uummaarinnerusumik pissarsiaqaataanerusumillu atorsinnaasut. Maannarpiarlu ingerlanneqarput webseminarit (digitaliusumik isumasioqatigiissitsinerit) sammillugit ilinniartitsissutit arfinillit, taakkununngalu 280-inik ikinnerunngitsut peqataajumallutik nalunaarnikuupput.
Maannalu alloriaqqinnissaq piareerfigaarput.
Nunatsinni aamma attaveqaateqalernikuuvugut, periarfissarilernikuullugu atuarfiit siammaseqisumik inissisimasut ataatsimut sullisinnaanerat, taamallu nunani allani pissutsit allaaneroqisut aporfiginagit ingerlasinnaalernikuulluta. Ajornartosiutaavormi illoqarfinnut minnerusunut nuqarfinnullu ilinniarsimasunik ilinniartitsisussarsiortarneq, ilinniartitsisutullu naammasserlaat illoqarfinnut annerusunut kajungernerugajupput. Taamaakkaluartorli aamma tamakku ajornartorsiuteqarsinnaasarput. Kingullermik Inuit Piginnaatitaaffii pillugit siunnersuisut saqqummiuppaat, nunatsinni nunarput tamakkerlugu isigalugu nunaqarfinni ilinniartitsisut 48 procentii ilinniarsimasuungitsut.
Inerisartariaqarparput atuartitseriaaseq, ajornartorsiutinut taaneqartunut matussusiisinnaasoq. Tassanilu tassa avinngarusimasumiit atuartitsineq annertoorujussuarmik sunniuteqarluni iluaqusiisinnaavoq. Tassalu tassani Internet pitsaanerusoq, kikkut tamat iPadseqarnerat atuartitseriaatsillu atuartunut naleqqussakkat aqqutigalugit tamanna tunngavissinneqarpoq.
Kivitsisami upperaarput avinngarusimasumiit atuartitsineq piukkunnarluinnartuusoq, qanorli ingerlanneqassasoq ilikkarneqartariaqarluni. Ingerlatsinerlu nunarput tamakkerlugu nunaqarfinni illoqarfinnilu ukioq naallugu maanna ingerlanneqarpoq.Tassa uagut Kivitsisami upperaarput avinngarusimasumiit atuartitsineq periarfissaalluartuusoq, ilikkartariaqarippulli qanoq atorluarneqassasoq. Ineriartortittariaqarpagut periusissat, uagut tunngavitsinnut naleqqussagaasut, meerartagut nunattalu siammasissusia eqqarsaatigalugit. Tamannarpiaavorlu Kivitsisap avinngarusimasumiit atuartitsinermut atatillugu suliniutiginiagaa.
Programmi 18-inik assigiingitsunik siunertalersugaavoq, taakkunani tamani ilinniartitsisut avinnga-rusimasumiit sulinissaat tunngavigineqarluni. Tamakkunani atuartitsisut atuartitseriaatsit nutaat misilittartussaavaat avinngarusimasumiit atuartitatik aallaavigalugit. Ingerlanniakkat tamarmik qitiutitaqarput aallaavigalugit atuartitsissutit assigiinngitsut. Ataatsimoorutigaalli atuartut sumiiffin-ni ataatsimoortitaasarnerat ilinniartitsisuusut allani siammasissumiittut. Aammattaaq atatsimooru-tigaat atuartitsisut misilittaasarnerat atuartitsissutinillu tamarmik immikkut ilusilersuisarnerat, atuar-tut sulisillugit iPadsitik atorlugit sulillutik attaveqartartuullutillu.
Programmimut ilaatipparput ilinniartitsinermut atatillugu pikkorissaaneq, peqataasunullu ilitsersuisoqarttsineq ikiuillunilu oqaloqatigisinnaasaannik.
Avinngarusimasumiimmi atuartitsineq tiguinnarlugu ingerlanneqarsinnaanngilaq. Atuartitseriaasermi allarluinnaq atortariaqarpoq. Tassami qangatut klassini najuulluni atuartitsisarneq digitalimik ingerlatsinermut nuuinnarsinnaannginnatsigu. Suummi tamarmik naqqaniit eqqarsaatigeqqittariaqarput.
- Ungasianiit atuartut qanoq iliorluta sungiusimasatut attaveqarfigilersinnaavagut?
- Qanoq kajungertilersinnaavagut?
- Avinngarusimasumiit atuartitsineq tunngavigalugu atuartut qanoq iliorluta ilorrisimaartilersinnaavagut?
- Ungasianiit klassit qanoq aqusinnaavagut?
- Atuartut klassianni ilinniartitsisunik najuuttoqartariaqarpa?
- Taamaappat taassuma inissisimanissaa qanoq ittuussava?
Neriuppugut apeqqutigineqartut ilai aappaagu akissutissaqartilersinnaassallugit. Nuummi Ilinni-artitsisunngorniarfiup akissutissarsiornitsinni ikiorniarpaatigut. Ilinniartitsisunngorniarfimmimi ilisimatusartut ilinniartitsisuusullu arlaqartut ingerlanneqartussat qanimut malittariniarpaat, taama-tut iliornikkut aqqutaani misilittagaalersut katersorlugillu ingerlateqqittarniarlugit. Tamakkulu tamarmik siunissami avinngarusimasumiit atuartitsinermut ilusilersueqataalerumaarput.
Quppernermi matumani avinngarusimasumiit atuartitsinermut programmiliaasoq pillugu ingerlaavartumik malinnaalersinnaalissaatit.
Assersuutigalugu maannangaaq Lillian-ip Mettellu avinngarusimasumiit ilinniartitsinermik ingerlatsinerat pillugu atuagaqarsinnaalereerputit.