Amerlanerit inuunerminni PowerPoint-it takisuut, ilaannikkut takisoorujussuarnik nalaataqartarsimassapput. Pikkorissaanerni, ataatsimiittuni, pamersaanermik ulluni sammisaqarnerni atuartullu saqqumiussinerinni. Imaassinnaavoq aamma illit takivallaalaartunik naammaannartunillu saqqummiussasaliortarsimassasutit. Aajukuli illit atuartuutivillu saqqummiussisarnissaannut sulilu pitsaanerulersinnissaannut siunnersuutinnguit 6-it.
1. Allataq
Eqqaamassavat saqqummiussassatit digitaliusut oqaatsitigut saqqummiussassannut tapertaannaammata. Tassa imaappoq peqataasut saqqummiussani allatatit ukkatarisussaanngilaat, oqaatsitigulli saqqummiussarnut tapertaasussaallutik. Taamaammat takisuunik allannaveersaarit. Qulequttat atukkit. Allatatit soqutiginnilersitsissapput, atuarnissaalli sivisusussaanngilaq. Eqqaamassavat peqataasut allatatit atuarniarniarsarissammatigit, taamaasillutillu illit tusarnaarnissat allatavillu atuarnissaat ataatsikkoortissinnaanngikkaat. Eqqaamaguk saqqummiussaq skærm-ikkuussammat imaluunniit projektor-ikkut. Pingaarutilerujussuuvoq naqinnerit ima mikitigissanngitsut, saqqummiiffinnit atuarneqarsinnaanatik. Naqinnerit minnerpaamik 30pkt. atornissaat innersuunneqarpoq.
Naqinnerit toqqagassavit skærm-imi ersarinnissaat maluginiaruk, atuaruminarlutik inersuarmilu tunorlerni issiasut aamma takusinnaasussaavaat. Assersuutigalugit Arial, Helvetica imaluunniit font-it skærm-imi atuaruminartut. Naqinnerit assigiinngitsut amerlavallaat atornaveersaakkit, saqqummiussaq tukappalutsiinnartarpaat.
2. SLIDES-IMI OQARIARTUUT ATAASEQ
Saqqummiussaq pitsaasoq tassaavoq oqariartuutit peqataasunut ersarissasoq. Amerlasuut kukkussutigisarpaat paasissutissat amerlavallaat slides-imi ataatsimi paasissutissiarineqartarnerat. Taamaammat paasissutissat slides-inut arlalinnut agguakkit. Slides-it amerlanerussagaluarput taamaattorli oqaatiginiakkatit peqataasunit paasiuminarnerussapput.
3. ASSIT ATUKKIT!
Peqataasut soqutiginnilersissinnaavatit, slides-ini assit atorukkit. Assit oqaluuserisatit assiliartalersussavaat ikorfartorlugillu. Ajunngilaq assip slides-eq tamaat ulikkaaraluaruniuk. Internettimi kusanartunik erisarissunillu assinik nassaarsinnaavutit. Taamaattorli pingaaruteqarpoq assit killilersuugaanatik atorneqarsinnaanissaat, assiliisullu aqqa allanngikkaluarlugu atorneqarsinnaasut atussallugit. Aajuku quppernerit pitsaasut assinik akeqanngitsunik ujarlerfiusinnaasut, piginnittussaatitaanertaqanngitsut.
4.QALIPAATIT EQQUMAFFIGIKKIT
Saqqummiussassarnut qalipaatissanik toqqaaleruit, qalipaatit imminnut tulluuttut toqqarukkit iluaqutaasinnaavoq. Qalipaatit tulleriinnerinut allattuiffik, (farveskema), atorukku ikiuutaalluarsinnaavoq. Qalipaatit tulleriinnerinut allattuiffimmi, qalipaatit nuannersut imminullu tulluartut takuneqarsinnaapput. Qalipaatit amerlavallaat paatsiveerunnarsisarput, imminullu tulluarsagaanngippata, eqqissisimanartuussanatik. Nalinginnaasumik qalipaatit pingasut-sisamat toqqarneqartarput, atuakkap ilusissaanut ataavartumik atugassat. Qalipaatit imminnut tulluartut, nuannersumik ataqatigiittarput. Tamannalu ilusilersuisartut eqqumiitsuliortullu atortarpaat iluarusunnartumik misigisitsiniaraangamik.
Aajuku qalipaatit ataqatigiissinnissaannut malittarisassat tunngaviusut.
Qalipaatit illuatungeriittut (komplementærfarver)
Qalipaatit illuatungeriittut, qalipaatit ammalortuliamiittut (farvecirkel), qalipaatit illuatungeriittutut taasarpaat. Qalipaatit illuatungeriittut imminnut akerleriittutut inissisimasarput, taamasillutik sakkortuumik takutitsisarlutik.
Qalipaatit taakku ataatsimoortillugit ersarissuusarput.
Qalipaatit monokoromatiskit
Monokoromatisk-imik ataqatigiinneq pilersarpoq qalipaat qalipaateqataanik akooraanni, qaqortumik imaluunniit qernertumik akullugu. Ataqatigiilluarneq taanna eqqissisimarpasinnerpaavoq, atorneqarnerpaajullunilu. Qalipaat ataaseq atorneqartarpoq, qaammarsarlugu imaluunniit taarsarlugu.
Qalipaatit assingusut (Analoge farver)
Qalipaatit imminnut assingusut tassaapput qalipaatit pingasut, qalipaatit ammalortuliami (farvecirkel) sanileriittut. Qalipaatit assingusut atorlugit ataqatigiinneq pilersinneqartarpoq, qalipaat sunaluunniit qalipaatit ammarlortuliaani inissimasoq toqqarlugu, qalipaat talerpiata tungaaniittumik imaluunniit saamiata tungaaniittumik ilallugu. Qalipaatit assingusut atoraanni eqqissisimanartumik pilersitsisarput. Internettimi sakkussat pitsaasut nassaarineqarsinnaapput, qalipaatinik eqqortunik toqqaanissarnut ikiuutaasinnaasut.
Aajuku assersuutit pitsaasut pingasut:
Canva Color wheel
Colorhunter.com
Adobe Kuler
5. PINGAANERUSUT ERSARISSAKKIT
Saqqummiussassanik sanagaangatta, eqqarsaqqajaasarpugut slide-p tunuliaqutaa pappiliaasoq – tunuliaqutaq qaqortoq qernertumik imaluunniit taartumik allannilik. Taamaattorli analogit digitalillu assigiinngissusii annertupput. Saqqummiussatit skærm-ikkut imalluunniit projektor-ikkut saqqummiunniaraangakkit, qaamaneq atorneqartarpoq. Imaappoq qaamanerusut maluginiarneqarnerusarlutik, tassa qaammaqqanerusut. Taamaammat qaqortoq tunuliaqutitut atorukku taanna malunnanerussaaq, assersuutigalugu taartumik allatamiit. Qalipaatit taakku illuatungeriit paarlaallugit misiliguk – tunuliaqut taartoq allatarlu qaamasoq. Tassunga tunngatillugu immikk. 4-imi, qalipaatinut paasissutissanut tunngasut, atorluarsinnaavatit.
6. AALASULIAT EFFEKTILLU ATORNERI
Programmit Powerpoint, Keynote, Google Slides assigisaallu kusanartunik sunniuteqarluartunillu aalasulianik neqerooruteqarput. Taakkuli mianersuullugit atugassaapput. Qaratsatta aalasut maluginiassallugit aaqqitaavoq. Taamaammat slide-liarni aalasuliarpassuarnik ikkussuussiguit, peqataasut taakkununnga samminerussapput oqaatsitit pivallaarnagit. Taamattut oqareerluni imaanngilaq aalasuliat effektillu allat atussanngikkitit. Aalasuliat atorluarneqarsinnaapput suleriaatsinik nassuiaanissamut. Aalasuliat aamma iluaqutaasinnaapput assersuutigalugu saqqummiussassat ilisaritinneranni imaluunniit sammisarni oqaatsit pingaarutillit ersarissarnerini. Taamaasinermi oqaatsit ataasiakkaat saqqummiuttaarsinnaavatit, illit tulleriiaarinerit malillugu. Iluaqutaasinnaavoq peqataasut oqaatsimut aaliangersimasumut imaluunniit saqqummiussamut takutinneqarusuttumut malinnaatinniaraanni.
Suli pitsaanermik saqqummiussinissamut siunnersuutit 6-it – Pisariaqartippiuk atuagassiaq PDF-itut aanissaa? PDF-itut aajuk.