Marlunngormat ulloq 3. maj Pilu aamma Seth siullermeerlutik webinarertitsipput. Pineqartut taakku tamarmik Sisimiuni Nalunnguarfiup Atuarfiani Ikiortitut inissisimasuupput. Kivitsisallu nittartagaa aqqutigalugu nunatsinnit tamarmiusumit ilinniartitsisut 38-it peqataaniarlutik nalunaarsimapput. Pilu Sethilu kisimik webinarertitsisuussanngillat. Tassami webinarertitsinerit majimi ullut tamakkingajallugit ingerlanneqassapput, Webinarillu eqimattat marluussapput aappaani siullermi ingerlanneqarsimasut aamma tunngaviusassallutik, matumanilu illit suli angumerisinnaavat peqataanissat nalunaarutugis-sallugu, uugguna:
Skoletube pillugu tamanik webinarertitsinissaq
Marlunngormat sammineqarpoq atuartitsinermi Aha-slides-ip qanoq atornissaa. Taanna programmiuvoq qanittukkut Skoletube aqqutigalugu iserfigisinnaaligarput. Webinarimilu pineqartumi Pilup Sethillu taassuma atornissaa ilinniartitsissutigissavaat.
Stina Nielsenilu Nuummi Atuarfik Hans Lynge-meersoq webinarernermi peqataavoq, Pissarsiffigeqaalu tulliuttunullu aamma peqataanissani saaffiginnissutigereerlugu:
“Pisoq tassaarpiaavoq atorfissaqartitara. Programmimillu ilisaritsitsineq erseqqilluarlunilu pitsaalluinnartumik ingerlanneqarpoq, ilitsersuutigineqarluni tamatuma atuartitsinermi qanoq atornissaa. Aammalu pitsaalluinnarpoq pikkorissaasuusut uatsitulli ilinniartitsisuunerat. Taamatummi tunngaveqarnermikkut ulluinnarni qanoq ingerlariaaseqarnerput ilisimavaat pitsaavorlu kalaallisut oqaatsivut atorlugit ilinniartitsinerat”.
Webinarini taasami ilisaritinneqarpoq qanoq atorneqarsinnaanera ilusiligaaneralu, kisianni pingaarnertut sammineqarluni tamatuma ilinniartitsinermi qanoq atorneqarsinnaanera.
Marlunngormallu sammineqartoq tassaavoq Aha-slides. Taana online-programiuvoq, saqqummius-sinermi atortussiaq peqataasut atuartinneqarnerminni peqataallutik aamma atorsinnaasaat. Tassanilu Pilup Sethillu Aha-slides nammineq atussallugu aaliangiussimavaat, taamatullu iliornermikkut ilinnartitaasut takusinnaalerpaat taassuma qanoq atorneqarsinnaanera. Misiliippullu kingornatigullu takussutissiarineqartut nalilersorneqarput – soorunalumi tassani aamma Aha-slides atorneqarluni
“Programmi pineqartoq periarfissalerujussuuvoq, uangalu atunngitsoornavianngilara. Nuannarilluinnarparalu programmi taanna atorlugu saqqummiussinermi peqataasut aamma peqataatinneqarsinnaammata.
Aammal pitsaasuuvoq programmip online-iunera taamaattuuneratigummi peqataasut inimiittuusaria-qanngimmata. Taamatummi inneratigut atuartinneqartut angerlarsimagaluarlutilluunniit peqataasin-naammata”, Stina oqaluttuarpoq.
Taaneqartutut webinarertitsineq Pilumut Sethimullu siullerpaajuvoq. Ingerlatsinissarli pitinnagu Kompasimi siunnersortit piareersarnermi ikiuussimapput ingerlatsinissaannik ilinniartillugit. Pilulu imatut oqaluttuarpoq:
“Siullermik eqaasarpugut: ”ila-aa 38-it peqataajumallutik nalunaarsimapput”. Misigimavuguullu soorlu uagut soraarummeertussaalluta. Kisiannili aallartiinnarlutali misigisimalernarpoq soorluli atuarfitsinni suleqatitsinnut workshopertitsiinnarluta. Misigisaq nuanneqaaq taamatut naapillugillusooq ilinniartitsi-soqaterpassuit ilisisarisimanngisat”.
Kisiannili tassa Pilu aamma Seth kisimik webinarertitsisuusussanngillat. Pingasunngormallu ualikkut Sussi, Arnaq aamma Andreas Gammeqarfimmeersut Pixton sammillugu ilinniartitsipput sisamanngor-nikkullu Pipaluk, Arnaq aamma Erneeraq Thinglink pillugu webinarertitsinissaminnut piareeqqallutik. Sapaatillu akunnerata tulliani programminik Skoletube-imiittuunngitsunik sammisaqassaagut. Tassani Ida, Marie aamma Marie Tasersuup Atuarfianeersut Showbie tunngavigalugu sammisaqartitsissapput kiisalu Aajaraq aamma Najannguaq Atuarfik Mathias Storchimeersut ilinniartitsinermi fiilmiliornissamut atortussiaasoq iMovie pillugu webinarertitsissallutik.
Taava aallaqqaataaniit aallarteqqissaagut sammineqareersut sammeqqillugit. Taamatut iliornitsigut neriuutigaarput amerlanerpaat peqataanissamut periarfissaqalersinnaajumaartut.
Peqataaniarnissat eqqaamajuk atuartitsininni nutaanik isumassarsisinnaaniassagavit.
