Pingasunngorneq ullaap tungaajugaa 3.b-kkut Atuarfik Samuel Kleinschmidtimiittut uummaareqaat. Atuartut nipaatsumik oqaloqatigiinnerisa akornanni nipit iPadikkut immiussat sukkut tamaana tusarnaarutit ikkuffimminnit peeraangata tusarsaapput. Ini atuartitsiviusoq ulikkaaqqavoq. 3.b-mi atuartut, ilinniartitsisui Erneeraq aamma Heidi naliginnaasumik isersimapput. Aammali meeqqat atualertussat meeqqerivimmit Paarsisoq-meersut isersimapput.
Atuartut atualertussallu marlukkaarlutik issiapput. Atualertussat atuartut iPadii alapernaallutik toortallattaavaat. Atuartut sanianiipput pulaartuaqqatillu ikiorlugit. Ilinniartitsisuisa perorsaasoq nikorfaqatigaat. Qungujulallutik malinnaapput. Magdalene aamma najuuppoq. Tanna kommunimi atuartitsinermut siunnersortiuvoq. Atuartut ornillattaavai ikiugassaagaangatalu ikiortarlugit.
Tigusisussanut saqqummiineq
Pisoq sioqqullugu sapaatip akunnerani marlunni kalaallisoornermi danskisoornermilu ingerlatsisoqarpoq. Magdalene peqatigalugu Erneeraq Heidillu “Ilisimanerulertigut” Nutaaliorta – Kivitsisap atortussiaateqarfittaava aqqutigalugu ingerlappaat. Atortussiani atuartut videut aqqutigalugit atuakkanillu atorniartarfimmiinnermi atuakkat paasissutissanik imallit paasisaqarfigaat. Kingorna namminneerlutik atuakkiorput – aalajangersimasumulli tunngasumik. ASK-imi atuartuuneq pillugu atuakkiorput.
Atuagaq digitaliusumik app’imi Book Creatorimi suliaraat, tassani assinik ikkussuisinnaapput, filmiliorlutik, nipinik immiussillutik, titartaallutik il.il. Allassinnaasut aamma allapput. Atuakkiatik naammassimmata atualertussat saqqummersitsinissaminnut qaaqquaat. Atualertussaaqqanut atuakkat isigalugillu tusarnaarnerani sommerferiap kingorna susoqassanersoq takorlooruminarnerulissaaq. Atuartut aamma ilikkagaqaqaat. Kivitsisamit oqaatigineqartartutut ilisimalikkaminnik misissuipput, pilersitsipput saqqummiussillutillu. Pitsaasunik apeqqusiisinnaalerput, atuakkanik paasissutissanik imalinnik atualersinnaallutik, namminneq atuakkiassaminnut isumassarsiorput, qaaqqusissutiliorlutik saqqummersitsinissarlu piareersarlugu. Ilisimalikkatik aallavigalugit tusarnaartunut saqqummiipput. Pulaartitsilluartuuneq ilikkarpaat atualertussallu atuarfimminnut tikilluaqqullugit.
“Atuartut suliaqarnerat takullugit nuanneqaaq. Akisussaaffimmik tigusilluavissorput suliatillu tulluusimaarutigalugit. Nuanneq taamanna misigalugu” saqqummersitsineq pillugu Erneeraq oqaluttuarpoq. “Atualertussat pulaarneranni marluullusi isigigaassi”, Magdalene akuleruppoq illariaatigalunilu ilinniartitsisunut taakkununnga marlunnut oqarluni: “Atuartuniilluunniit tulluusimaarnerorpasippusi”.
Ilisimanerulertigut
Atuartitsinermi atortussiaq “Ilisimanerulertigut” ingerlatsineruvoq ataqatigiissoq fagini kalaallisut, inuiaqatigiilerinermi inuttullu ineriartornermi lektionit 12-t missaanik sivisussuseqartoq. Atortussiat atuartitsinermut alloriarnermiit alloriarnermut allaqqasunik ilitsersuummik atuartunullu atortussianik ingerlatsinermi atorneqarsinnaasunik imaqarpoq.
“Piareersaleratta annertorpasikkaluarpoq. Aallarteriarattali ajornanngitsuaraavoq. Suut tamarmik piareersimapput. Tassa klassimi alloriarnermiit alloriarnermut suliassagut tamarmik allaqqareeramik.”, ilinniartitsisut oqarput naggasiillutillu “Taava aamma iluaqutaarsuaarpoq iPad-mi app’it atornissaat tamarmik aamma ilitsersuuteqareerneri”.
Magdalene ingerlatsineq tamakkerlgu peqataavoq annerpaartaalu isumagalugu. Kommunimi atuartitsinermut siunnersortaavoq atuarfinniittutullu ikiortitut atuuffeqarluni.
Ingerlatsinerpassuit assigiinngitsut. Periuserpassuit assigiinngitsut
Kivitsisami anguniagaavoq iPad-t atornerini atuartut suliaqartassasut. Misissuissapput, pilersitsillutik saqqummiussillutillu. Ilinniartitsisunut nammineq ilinniartitsinermi ingerlatassanik sammisaqartitsinissanillu ujartuineq unammillernarsinnaavoq. Annerusumik aallaqqaammut. Tassanerpiaq Nutaaliorta ikorfiisinnaavoq. Nutaaliorta tassaavoq ingerlatsinerit assigiinngitsorpassuit, tamarmik Kivitsisap ilikkarsaaneranut naleqquttuusut. Ingerlatsinerit ilaat sivisunerupput, soorlu “Ilisimanerulertigut” taamaattoq, allat sivikitsukullaapput. Siunertarli taannaannaavoq: Ilinniartitsisut Kivitsisap ilinniarnermut periusaannik tunngaviliisumik atortussaqartinnissaat.
Erneeraq aamma Heidi maanna atortussiat allat nutaaliorta.gl -imiittut misilerarnissaannut piareeqqapput. Takusinnaavaammi ingerlatsinermi atuartut qanoq tunniusimatiginersut.
