Lillian Møller ilinniartitsisuuvoq ukiorpassuarnilu nunaqarfinni ilinniartitsinermik misilittagaqarluni. Nunaqarfimmi najugaqarfigisamini atuartitsisarnermi saniatigut aamma ilinniartitsisuuffigai nunaqarfiit allat sisamat. Taakkunani avinngarusimasumiit atuartitsisarpoq, taakkunani allatut ilinniarsimasumik ilinniartitsisussaqanngimmat.
Tiguartisimaqalutik atuartut natermi issiapput qiortaallutik niaquliorlutik. Niaqqut ilaquttaasa niaquinut assingussapput saniatigullu taakku tuluttut oqaluttuarinissaannut sungiusarput.
Aappilattumi atuarfimmiippugut, tassanilu atuartut sisamaasut sisamanngorpat atuartinneqarnissaminnut piareersarput. Taavami Lillan iPadsitigut nuisussaavoq. Taavalu atuartut ilaquttatik pillugit oqaluttuartussaapput niaqqullu qiortakkatik takutissorlugit.
Kingusinnerusukkut nunaqarfimminni ingerlaassapput ilaquttami illorisaat assiliortorlugit. Taava assilisatik katitissavaat filmeeraliorlutik, tuluttut oqaluttuarnermik nipitalersorlugu. Filmiliatik Lillianimut nassiutissavaat, allarluinnarmiillunilu taassuma takusani pillugit atuartunut qisuariaateqarluni utertitsiortussaaq. Pisussat tamarmik Lillan Møllerimit piareersagaapput, taannami ilinniartitsisut allat 22-iusut peqarigalugit Kivitsisap nuna tamakkerlugu atuuttumik programmiliaani peqataavoq.
Lillian savaateqarfimmi Uummannartiivarami najugaqarpoq nunattalu kujataani nunaqarfimmi Igalikumi atuarfimmi atuartitsisuulluni. Tassani nunaqarfimmi meeqqanik atuartitsineq annertuumik misilittagaqarfigaa namminerlu suleriaasissamik pilersitsimalluni, nunaqarfinni atuarfeeqqanut naleqquttumik. Taamaattunimi ukiumikkut nikingasut ataatsikkut atuartinne-qartarput. Ukioq mannali allaavoq, tassami nunaqarfiit sisamat allat sisamat ilinniarsimasumik ilinniartitsoqanngitsut saniatigut ilinniartitsisuuffigilernikuugamigit. Tassa taaneqartuni ingerlanniakkani suliakkersuinissanilu ulluinnarni sulinermi saniatigut ingerlatarilernikuuai, atuartunut pineqartuneersunut agguaassassani.
“Nunaqarfinni atuartitseriaatsinik misilittakkakka allanut aamma tunniussinnaalernikuu nakka, atuartunut ilinniartitsisutullu sulisunut allanut,” Lillian Møller oqaluttuarpoq. Taassuma ilaatigut ilinniartitsissutigivai tuluttoortitsineq naturfagilerisitsinerlu.
Meeqqat suliaqarlutik peqataaneq sungiusarpaat
Showbie atorlugu Lillian atuartitaminut suliassanik agguaassilluni siammartiterisarpoq.
Taava klassini avinngarusimasumiit atuartinneqartut ilinniartitsisutut sulisunit najuuttunit ikiorneqarlutillu ilitsersuunneqartarput. Kisiannili Lillianip akisussaaffigivai ilinniagassanik eqqortumik ilinniagassarsiuussisarnerit ingerlatseriaasissallu – sumiiffimmiittut ikorfartuisutut ikiuuttarput. Lillianillu ilinniartitsisutut sumiiffinni allani sulisuusut sapaatip akunneranut ataasiarluni digitaliusumik ”naapittarpai”. Tassanilu pilersaarutit suliassallu oqaloqatigiissu-tigisarpaat, Lillianillu suleqatini siunnersortarpai, qanoq atuartunik ikorfartuillutillu ilinniartitsissasut.
Sapaatip akunnerata ingerlanerani Lillian atuartut suliaannik showbie atorlugu utertitsi-vigisarpai. Sapaatillu akunneranut ataasiarluni digitaliusumik ”naapittarlugit”. Taava atuartut Lillian saqqummiussivigisarpaat ilinniagassiissutigisallu pillugit itisileralutik oqaloqatigisarlugu.
“Atuartitsinernimi aaqqissugaanngitsunik naammassiniagassaminnik suliaqartassanngillat. Tassami avatangiisitik atorluarlugit oqaloqatiginninniviit ingerlattassavaat. Namminnerlu aamma assigiinngitsunik tunniussuisassapput oqaloqatigiissutigisinnaasatsinnik”, Lillian oqarpoq.
Taamatut atuartitseriaatsimi Lillianip qaqitat digitalimillu stortussiaasut Atuartullu iPadsitik atorlugit assiliortuisarput, filmiliorlutik, titartakkat atorlugit takutitassaliorlutik il.il., tamatigut aallaavigalugit imminnut attuumassuteqartut. Kisiannili aamma siusinnerusukkut eqqartorneqartutut ilaatigut pappialat atorlugit sulisarput, qiortaallutik qalipaasersuillutillu.”
“Atuartut amerlanertigut suliatik soqutiginartittarpaat suliaqarnissartillu tamangajammik qilanaarisarlugu. Timelærerit arlaata oqaluttuuppaanga, atuartut ilaat aallaqqaataani tuluttut oqalukkumaneq ajorsimagaluartoq maanna oqalullunilu tuluttut allanneq misilitta-lersimagaa,” Lillian Møller naqissusiivoq nangillunilu:
“Attaveqaqatigiinnissamut nutaarluinnarnik periarfissaqalernikuuvugut. Maannalu atuartut allanit ikiorneqarsinnaalernikuupput. Isumaqarpungalu atuartut ilikkagarsinnaanerulersut. Timelærerit amerlanertigut pikkorittaqaat, kisianni ilinniarsimasuunngillat. Ila ingerlanneqartut soqutiginaqaat,” oqarpoq.
Lillianip Igalikomi atuartuutini suli atuartittarpai, kisianni tassa marlungornerni talliman-ngornernilu nunaqarfinni atuartut ilinniartitsisutullu sulisuusut allat aamma sullittarlugit.
Lilian aallaqqaataani mianersortumik ingerlatsivoq, tassami atuartitami killiffii tipisioqqaartussaagamigit. Naapinngisaannarnikuuaami, isumaqarporli kigaatsumik imminnut ilikkarnissartik qularnaatsuusoq.
Siunissaq ungasinnerusoq isigalugu pilersaarutaavoq pineqartuni atuartinneqartut suleqatigiissinneqartalerumaartut. Taamatullu iliornikkut ilinniarsimasunik atuartitsisoqarfiunngitsut ilinniarsimasumik ilinniartitsisoqalissapputtaaq. Taamatut ingerlasoqalerpat aamma tamanna atuartut pissarsilluarfigisussaassavaat, ilaatigut eqqarsaatigalugit atuarfimminni ukioqatiminnik atuaqateqanngittarnerat.
Kivitsisap avunngarusimasumiit atuartitsinermut atatillug programmia
- Mettep ingerlataa Kivitsisap avinngarusimasumiit atuartitsinermut atatillugu programmianut ilaavoq
- Programmip iluaniipput siullermeerutaasumik ingerlatassatut aaliangiussat assigiinngitsut 18-iusut
- Ingerlatassat tamarmik assigiinngitsunik qitiutitanik sammiveqarput atuinissallu assigiinngisitaartuullutittaaq
- Programmi aqqutigalugu anguniagaapput, meeqqat atuarfiisa pitsaasumik avinngarusimasumiit atuartitsiviusinnaalernissaat
- Ilinniartitsisut tamarmiusut ingerlaavartunik pikkorissartitsinerni ilaasarput ilitsersuisumillu suleqateqartarlutik
- Nuummi Ilinniartitsisunngorniarfimmi ilisimatusartuusut ingerlanneqartut malittarivaat misilittagaalersunillu katersuisuullutik.