2018-imi Kalaallit Nunaanni kommunit tallimaasut ataatsimoorlutik Kivitsisa pilersippaat. Kommunit taamaalillutik oqaluttuarisaanermi aatsaavissuaq ataatsimoorlutik meeqqat atuarfianni assigiissaartumik atuartut ilikkariartornerannut kivitsiniarlutik qanimut suleqatigiissuteqarput. Kivitsisa ingerlasinnaaneranut aammattaaq Ilinniarfissuup Ilinniartitaanermut Aqutsisoqarfiullu suleqatiginerisigut pivoq.
Kommunit assigiinngeqimmata Kivitsisa kommunini ataasiakkaani ineriartortinneqarnera assigiinngilaq, tamarmilli suliniummi siunertaasoq suleqatigiikkusunnerlu assigiissutigaat.
Kivitsisap pingaaruteqarnera
Kivitsisap siunertaraa meeqqat atuarfiini ilikkariartornerup pitsaanerulernissaa. Tamanut iPadinik agguaanermi internetikkullu attaveqarniarnerup pitsaanerulernerani atuartitsineq assigiinngitsorpassuartigut – ajunngitsumik atoraanni – soqutiginartunik periarfissiisarpoq: Atuartut paasisassarsiorsinnaapput, pilersitsillutik paasisaminnillu saqqummiussillutik, atuartut nunaqqatitik avataaneersullu suleqatigisinnaavaat, alimasissumit atuartitsisoqarsinnaavoq sulilu amerlanerusumik periarfissaqarluni.
Atuartut aqutsisullu periarfissanik taakkunani ilinniartinneqallattaassapput. Anguniagaq, tassaasoq sakkussat taakku atuartut ilikkariartornerinut pitsaanerulersitsisut, anguniaraanni suleqatigeeriaatsit nutaat pinngussapput, periutsit iluatsittut avitseqatigiissutaassallutik.
Sutigut tamatigut suleqatigiinneq Kivitsisami pingaartinneqartut ilagaat. Aamma atuarfinnut tunngassuteqanngitsunit Kivitsisa tapersersorneqarluarpoq. Kivitsisap ineriartornera aningaasaateqarfinnit annertuunit sisamanit taperneqarpoq: Villum Fonden, Hempel Fonden, A.P Møllerip nuliatalu Chastine Mc-Kinney Møllerip siunertanut nalinginnaasunut aningaasaateqarfianit aamma Oak Foundation Denmark. Aningaasaateqarfiit taakku sisamaasut Kivitsisap aqutsisuini aallartitaqarput allat suleqataasut inuillu allat suliniummi tapersersuerusuttut qanimut suleqatigalugit. Ataani Kivitsisap aaqqissuussaanera takuneqarsinnaavoq.
KIVITSISAP AAQQISSUUNNEQARNERA
Piginnaanertusaariaatsit nutaat
Ilikkariartorfiup allanngoriartornera atuarfinni ataasiakkaani taamaallaat pisinnaavoq atuartitsisut digitalikkut periarfissat atorluarsinnaaneranik paasinnissimappata. Kivitsisami suleqatigiinnermut piginnaanertusarnermullu periarfissanik siammasissunik nassaarsiortoqarluni atorneqarsinnaasunik atuisoqarpoq. Taakku amerlanersaat digitaliusukkut ingerlanneqartarput – ilaatigullu timitalerluni naapinnerit digitalimillu ingerlatsinerit akuleriisillugit ingerlatsisoqartarpoq. Taamaaliornermi ingerlatat sivisuut ataavartullu, siornatigut periarfissaasimanngitsut, piviusunngorsinnaapput.
Kivitsisap piginnaanertusartitsineri tamarmik sapinngisamik ilinniartitsisut ulluinnarni sulinerminni sungiusimasaannut qanitsinniartinneqartarput, piujuartitsineq oqaatigineqareersutut anguniarneqarluni.
Piujuartitsineq nunagisami nukiit atorlugit siunissamik aalaakkaasumik pitsaasumillu ineriartortitsinermik, peqataasut namminneerlutik piginnaanertusaasinnaanngortinnerinik paasisassaavoq. Tunngaviusumik Kivitsisa ilikkakkat allanut ingerlateqqinnissaannut tunngasuuvoq. Tamanna assersuutigalugu pisinnaavoq avataanit siunnersortit sumiiffinni atuartitsisut, ilinniartitsisut, mentorit imaluunniit siunnersortit piginnaanertusarnerni aalajangersimasuni piareersaasiornermi ikiuutaaneranni. Piginnaanertusarnermi tassani pingaarutilerujussuartut inissisimasut tassaapput ikiortit – taakkuuppullu piginnaanertusarnissamut ikiuisut.
Ikiortit - ikiusisut
Ikiortit tassaapput atuarfinni siunnersortit. Taakku suliassaat tassaavoq ulluinnarni suleqatimik atuartitsineranni qanimut ikiuineq. Ikiortit suleqatiminnut workshopertitsisarput, taamatuttaaq atuartitsinermi ingerlatat piareersarnerini, ingerlanneranni nalilersornerannilu peqataasarlutik. Ikiortit aamma ilinniartitsisunik ilinniartitsinissaminnut avitseqatigineqarnissaminnullu piareersimapput. Aammattaaq ikiortit ilinniartitsisut atuarfinnit minnerusuneersut, ilaatigut najugaqarfigisami avataaniittut, tikillugit digitalimilluunniit pikkorissartarpaat.
Ikiortit Kivitsisa aqqutigalugu suleqatiminnik ikiusussanngorlugit ilinniartinneqartarput. Tamannalu “Ikiortit Naapiffik” aqqutigalugu pisarpoq – tassaasoq ornigulluni imaluunniit atortut digitaliusut atorlugit ataatsimeersuarnerit workshopernerillu. Naapiffimmi ikiortit pamersaanerup atuartitseriaatsillu nutaanerusut pillugit saqqummiiffigineqartarput aammalu teknikkimik suleqatinillu ilitsersuussisinnaanermik ilinniartinneqartarlutik. Tassuuna ikiortit akunnerminni attaveqaatit pilersittarpaat. Ikiortit aamma qaammatikkaartunik webinarernerni Kivitsisamilu suliniummi aqutsisoq peqatigalugu qanimut avitseqateqarnikkut isumassarsiortinneqartarput.
Tunngaviusumik Kivitsisami ileqquliunneqarsimasoq tassaavoq, ilikkakkanik ingerlatitseqqiinnginneq inerteqqutaasoq.