Upernaap ingerlanerani ikiortit 46-t ilinniartitsisuniit ilinniartitsisunut onlinekkut pikkorissartitsissapput avitseqatigiinnertalimmik suliamullu tunngasunut ataatsimoorfeqarnissamut. Atuarfiit taamak siammasitsigitillugit atuartitsinermi kiserliornarsinnaasarpoq. Kivitsisap webinarertitsisalernerani ilinniartitsisunut nuna tamakkerlugu ataatsimoorfiuvoq.
“Allan misilittagaat tusarlugit ilinniarfigalugillu iluaqaaq. Allanit isumassarsiornermi nammineerlunga ilinniartitsininnut iluaqutaavoq,”
Taamak Upernavimmi Prinsesse Margrethe Atuarfianeersoq, Ane Sofie Løvstrøm oqarpoq. Taanna ilinniartitsisorpassuit allat assigalugit upernarnerani Kivitsisap webinartertitsinerani peqataasimavoq – onlinekkut pikkorissarneq ilinniartitsisunit isumassarsiortitsilluni ingerlanneqarpoq
Webinarit ikiortinit ingerlanneqartarput. Nuna tamakkerlugu atuarfiit annerit ikiorteqarput, taakkulu ukiut sisamat kingulliit ingerlanerini ulluinnarni ilinniartitsisoqatiminnut ikiuinissaminnut ikorfartuinissaminnullu ilinniartinneqarput. Ikiortiutit atuarfimminni ilinniartitsisoqatiminnik ikiuisarnerat nalinginnaasuuvoq, piffissarli una nuna tamakkerlugu ilinniartitsisoqatiminnut isumassarsiortitsipput. Soorlu atuartitsinermi taamaattartoq webinarit iPadikkut ingerlanneqarput, naallu ilinniartitsisut piffinni assigiinngitsuniikkaluarlutik assigiinngitsunillu tunuliaquteqaraluarlutik webinarernerit suliamut tunngatillugu amigaataasinnaasartunut ataatsimoorfissamut aqqutaasinnaapput.
“Immersornaqaaq ilinniartitsinissannullu isumassarsiorluarpunga. Ilaanni tamanna ilinniartitsisutut amigaatiginarsinnaasarpoq. Atuarfitsinni amerlanngilagut. Sapaatip akunnerani ilinniartitsinissannut webinarternera ilikkagaqarfigaara. Nutaamik isumassarsiornissannut piumassuseqalerpunga – piumassuserlu taanna atuartunut ingerlateqqissavara.” Ane Sofie Løvstrøm, ilinniartitsisut 14-t allat peqatigalugit “Kalaallisoortitsinermi allaatigisanik isornartorsiuineq”-mi peqataasoq, ilassuteqarpoq.
“Immikkuullarissutigaa ilinniartitsisunit ilinniartitsisunut pikkorissaanerummat. Ilinniartitsisut ilinniartitsisoqatimik ulluinnaat tassanilu suut unammillernarsinnaanersut nalunngilluinnarpaat. Taamaammat ikiortit ingerlatsinerat isumaqarluarpoq – aammami taamaaliornissamut ukiuni sisamani piukkussarsimapput – nunallu iluani ilinniartitsisunut allanut isumassarsiortitsillutillu ilikkakkaminnik ingerlatitseqqipput,“ Rune Nydam Bundgaard, Kivitsisami suliniummi ingerlatsisoq nassuiaavoq, nangillunilu:
“Taamaalilluta avitseqatigiinneq ataatsimullu ilikkagaqarneq, ilinniartitsisorpassuit amigaatigisartagaat, pilersissinnaavarput”.
Upernaap ingerlanerani ikiortot 70-t katillugit webinarit 46-t ingerlatissavaat. Pikkorissarnerpassuuppuut sammisarpassuullutillu – ilaatigut “Kalaallisut animationit akullerni”, “Nukarlerni matematikkimi misissuineq aallavigalugu atuartitsineq”, “Siulitta oqaluttuanngortinneqarnerat titartaganngortinneqarnerallu” allarpassuillu. Webinarit tamarmik marloriarlutik ingerlanneqartassapput atuartitsinermullu aalajangersimasunik isumassarsianik imaqartassallutik ingerlaannaaq aqaguani atorneqarsinnaasunik
Ilinniartitsisut ineriartorusupput
Soorluuna webinarerneq aqqutissaasoq. Maannanut nuna tamakkerlugu ilinniartitsisunik tapersersorneqarluarpoq. Webinari “Kalaallisoortitsinermi allaatigisanik isornartorsiuineq”, Ane Sofie Løvstrøm-ip peqataaffigisaa, Nuummi Nuussuup Atuarfianit ingerlanneqarpoq.
“Onlinkkut atuartsitsineq imaannaanngitsuuvoq. Pikkorissartut skærmikkoorlutik suliaqarnerat soqutiginartuutinniarlugu piareersarluarsimasariaqarpoq. Webinarernerli ingerlalluarpoq, peqataasullu nersualaarinneqaat. Nuan!,” Ane-Marie Knudsen, suleqatinilu Linda Knudsen aamma Birthe Jeremiassen, pikkorissaasoq oqarpoq.
Novembarimi suleqatigiit taakku pingasuullutik nuna tamakkerlugu ikiortit peqatigalugit digitaliusumik “Ikiortit Naapiffik”-mik taaguusikkamik katersuupput. Tassani “pitsaasumik webinarertitsineq”-mi ilinniartinneqarput, suliffeqarfimmillu Koampas-imeersumit siunnersuisartunik ikiorneqarlutillu avitseqateqarlutik. Tamannalu webinarertitsinissaminnut iluaqutigisimaqaat.
“Piareersarluarpugut ilikkartitsinermullu siunnersortinit Teamsikkut pikkorissinissatsinnut ikiorneqarluta. Webinari sioqqullugu atortussat tamaasa Showbiekkut iliorarpagut – saqqummiussarput ilinniartitsisullu suliassaat. Nammineerluta webinarissagaangatta aammalu Ikiortit Naapifferaangatta aamma taamaattarpugut. Iluarneruvoq taamatut. Piareersimalluaqqissaarpugut,” Ane-Marie oqaluttuarpoq.
Ikiortit Naapiffiup saniatit ikiortit namminneq kommuniminni qaammatikkaartunik ukiuni kingullerni sisamani webinarerlutik naapittarput. Tassani ilinniartinneqarparput iPadillu atorlugit ilinniartitsinermut soqutiginartumut aammalu ilikkakkaminnik ilinniartitsisoqatiminnut apuussinissaminnut sungiusarneqartarput.
Isumalluarnarluarpoq
Kivitsisami onlinekkut avitseqateqarneq piginnaanertusarnerlu misileraalluarfiuvoq. Assigiinngitsutigut periutsit assigiinngitsut atorlugit misilerarneqarput. Ilaatigut sivisuumik ingerlanneqartut Ikiortit namminneerlutik misilippaat, taamatuttaarlu pikkorissarnerit sivikitsukullaat, soorlu taakku ikiortit ilinniartitsisoqatiminnut ingerlataat. Tamarmillu isumaqarluarput nunarput imaannaanngitsuummat.
“Suliamut tunngatillugu ataatsimoorsinnaaneq pisarnertut ingerlanneqarsimagaluarpata takorlooriarsiuk timmisartukkut billetit vikarillu qasserpassuit atorneqarsimassagaluarnersut. Taamaaliorsimasinnaanngikkaluarpugut. Maanna ikiortit ingerlatsisoralugit webinarertitsineq misilerareersimalerparput sulilu ineriartortinnissaanut periarfissarpassuit takusinnaavagut. Ilippanarluarpoq. Sumummita killissinnaavugut” Rune Nydam Bundgaard oqarpoq erseqqissaatigalugulu periuseq immaqa taamaallaat Kalaallit Nunaannut tulluartuusoq, geografi avinngarusimasunilu najugaqarnerput eqqarsaatigalugit.
“Ilinniartitsisut tamarmik avataanit isumassarsiorsinnaapput – taamaakkaluartoq ilutsinneersumik. Ulluinnarni pissutsinik ilisimasalinnit ilinniartitsisoqatinit ingerlanneqartarpoq. Nutaaliorneruvoq annertooq, taamaammallu iluatsippoq”.
Paasissutissat: Kivitsisap ukpernaami webinarertitsinissai (ikiortinit ingerlanneqartussat):
- Katillugit onlinekkut pikkorissarnerit 46-t – pikkorissaanerit 23-t marloriarneqartussat
- Webinarerneq ataaseq 1,5 tiimit sulinerup nalaani ingerlanneqartarpoq
- Webinarit tamarmik aalajangersimasumik isumassarsiornermut tunngaveqarpoq, peqataasut ingerlaannaq atorsinnaasaat
- Pikkorissarnerit eqimattanut sisamanut agguataarneqarput: Nukarlernut, Akullernut, Angajullernut immikkullu atuartitsinermut
- Ikiortit tamarmik ukiut sisamat ingerlanerini digitaliusunik tigussaasumillu piukkussarneq ingerlappaat
- Atuarfiit 22-t akornanni ikiortilinni pikkorissaanerit 18-it ingerlanneqassapput. Sumiiffinni ataasiakkaani internetikkut attaveqarniarneq suli pitsaavallaanngilaq.
Ikiortit webinarertitsinissaat marts 2023-p naanissaata tungaanut ingerlassaoout. Kikkulluunniit peqataasinnaapput, sulilu peqataanissamut nalunaartoqarsinnaavoq: