Nipituuliutigineq ajorpaat. Kisiannili Teknikerit qulit Kivitsisamut attuumassuteqartut pisuullutik ilinniaritsisut atuartullu meeqqat atuarfiiniittut iPadinik suliaqarsinnaapput aammalu illoqarfiit nunaqarfiillu akimorlugit alisissumik atuartinneqarsinnaallutik.
“Sapiitsuliortutut ersinngitsutut taagortarpakka,” Ulrik Motzfeldt-Skovgaard, Kivitsisami teknikimut akisussaasiq aammalu Qeqqata Kommuni IT-mi pisortaasoq oqarpoq.
“Taakkoqanngikkaluarpat Kivitsisa Kalaallit Nunaat tamakkerlugu meeqqat atuarfiini tamarni suliniut ingerlasinnaasimassanngikkarluarpoq,” nangippoq.
Sapaatip akunnerinnaa qaangiuppoq teknikerit Kivitsisap ukiumoortumik Nuummi Naapiffimmi katersuupput. Nalinginnaasumik ilinniartitsisuinnaat peqataasaraluarput, ukiorli manna teknikerit ilaapput immikkullu Naapiffimmi worshoperlutillu ilinniartinneqarlutik.
“Tamatta immikku kommunerisatsinni misilittakkatsinnik ajornartorsiutaasinnaasartunillu avitseqateqarnissarput pingaaruteqarpoq. Ullunilu pingasuni ataatsimoornitsinni teknikkikkut unammilligassaasarsinnaasut minnerit annerillu eqqartorluarsinnaavagut,” Ulrik nassuiaavoq erseqqissarlugulu kommunini teknikkikkut ajornartorsiuteeqqatut isikkullit teknikerit ataatsimoorlutik aaqqinngikkaangatigit angininngoratarsinnaasut.
“Systemitsinnummi atortorissaarutit 12.000-t attuumassuteqarput. Tassaniippullu app’erpassuit. Atortorissaarutit, taamaattumillu app’it amerliartortillugit systemi artukkeriartortarparput. Tamanna avinngarusimanerusuni ingammik malugisarparput, taakkunani app’it nutarternissaat ajornakusoorsinnaasarpoq inissisimaneq, taamaattumillu systemi apeqqutaallutik. Katersuunnermi ataatsimoorluta eqqartuisinnaavugut pilersaarusiorlutalu,” Ulrik nassuiaavoq nangillunilu:
“Nuummilu Naapiffimmi taamaaliorpugut.”
Ataatsimoorneq piumassuseqarnarneruvoq
Teknikkikkulli misilittakkat ajornartorsiutillu avitseqatigiissutigiinnarnagit ataatsimeersuarneq teknikerinut quliusunut immikkut pingaaruteqarpoq, ulluinnarnimi kommunini siaruaqqusaramik.
“Peqatigiinneq immikkuullarissumik pissarsiaqarnarpoq. Kalaaliulluta tunuarsimaartuunerput malugisinnaavara apeqquteqartoqartillugulu teamsikkuinnaq oqaloqatigiittarluta. Maanili ataatsimoornitsinni suulluunniit akimorlugit oqaloqatigiissutigisinnaavagut, taamaalillutalu allaanerujussuarmik misilittakkanik eqqartuisinnaalluta ataatsimuussusermillu misigaluta,” Ulrik, teknikereqatinilu unillatsiarnerni unnukkullu atuartinneqarnerup kingorna ilinniartitsisunik oqarloqateqartarlutillu nuannisaqatiginnittartoq.
“Teknikeritut suut tamaasa paasineq ajorpagut. Ilinniartitsisulli peqatigileratsigut klassini suut unammilligassarisarneraat, aammali Kivitsisami qaffasinnerusumik anguniakkagut pillugit paasinnissinnaassuseqalerpunga – tassa meeqqat atuarfiini kivitseqataaneq pillugu. Ataatsimuussuserlu katersuunnitsinni pinngorpoq – tamanna suliaqaqqinnissamut piumassuseqalersitsivoq suliniummilu suli angusaqarusunnermik pilersitsilluni” Ulrik oqarpoq erseqqissarlugulu teknikerit suliassaat pingaarnerpaaq maannamiit ilinniartitsisunut atuartunullu suli pitsaanerusumik systemip ingerlalernissaa.
“Kommunini assigiinngitsuni teknikerinut maannamiit suliassagut pissanganartorpassuupput – pingaarnerpaatulli anguniagaavoq atuarfinni skærmillu saniatigut pisut malunnannginnissaat – ajoquteqassanngillat atuartitsineq illoqarfinni nunaqarfiit atuarfiinni tamani ulluinnaat ajornaquteqanngitsumik ingerlassapput. Tassa taakkuupput ullut tamarluinnaasa ulapputigisartakkagut.”