Kommunit tamarmik, Ilinniartitaanermut Aqutsisorqarfiup ilinniarfissuullu akornanni qanimut suleqatigiilluarneq peqqutaalluni meeqqat atuarfiini atuartut tamarmik iPadeqarput, nuna tamakkerlugu internetimut attaveqaatit pitsaanerulernikuupput, ilikkariartornerillu atuartunik akuliusimanerutitsillutik. Kivitsisalli siunissaa qanoq isikkoqarpa? Siulersuisut siulittaasua Aka Grønvold isumaqarpoq Kivitsisa imatut attuumassuteqartigilersimasoq allaat unitsinneqaannarsinnaajunnaarsimalluni: “Kivitsisa pinngitsoorneqarsinnaanngilaq.”
Kivitsisa maanna ukiuni arfinilinni ingerlasimavoq. Ukioq 2018-mi aallartinneqarpoq aningaasaateqarfinnit sisamaasunit, Villum Fonden, Hempel Fonden, OAK Foundation Denmark aamma A.P. Møller og Hustru Chastine Mc-Kinney Møllers Fond til almene Formaal-mit aningaasaliiffigitinnermi. Ukiut arfiniliusut ingerlaneranni meeqqat atuarfiini ilinniartitsisut atuartullu, angajoqqaat ilinniarfissuarmilu ilinniartitsisunngorniat ulluinnarni allannguineq takullugulu misigaat. Nuna tamakkerlugu internetikkut attaveqarniarneq pitsaanerulerpoq, iPadi atuarfimmi atuartunut tamanut atuarnermi sakkussaalerpoq, atuartullu akuliusimatinneqarlutik ilinniartinneqarnerat annertusivoq aammalu alimasissumik atuartitsinermi Kivitsisa meeqqat atuarfiini inuiaqatigiinnilu inissilluarsimavoq.
“Kivitsisa meeqqat atuarfiini imatut inissilluarsimatigaaq allaat ilinniartitsisut atuartullu allanngorsimallutik. Ilinniartitsisorpassuit oqaluttuartarput atuarfinni ulluinnarni ikiortit, iPadit aamma atuartitsinermi internetimut attaveqarneq pinngitsoorsinnaanagit. Taamaammat pissutsinut Kivitsisaqalinngikkallarmat atukkanut uteqqinnissaq takorlooruminaappoq,” Kivitsisami januar 2020-mili siulersuisuni siulittaasoq, Aka Grønvold oqarpoq. Aka Grønvold siulersuisuniinnermi saniatigut Avannaata Kommuniani atuartitaanermut sunngiffimmut ulluuneranilu paaqqinnittarfinnut ingerlatsivimmi pisortaavoq Kivitsisalu aallartinnerani suliat 2018-mit malinnaaffigilerlugit.
“Meeqqat atuarfiini linniartitsisunik oqaloqateqaraangama oqariartuutigineqartarpoq Kivitsisaqarsimanngitsuuppat Kivitsisamiluunniit suliat unitsinneqassagaluarpata amigaatigineqalissaqisoq. Sorpassuartigut ilinniartitsisut atuartullu suleqatigiinnerannut pisariinnerulersitsivoq,” Aka Grønvold oqarpoq Kivitsisallu ilinniartitsieriaatsimut pamersaanermullu tunngavigisaa erseqqissarlugu. “Imminut napatissinnaasumik pilersitsivugut, tassani ikiortit atuartitsinermillu siunnersortit atuarfinnut ilisimasanik, misilittakkanik oqallinnernillu apuussisarmata. Taakkua saniatigut nuna tamakkerlugu ilinniartitsisunut piginnaanertusarnerit ilaatigut digitaliusukkut ilaatigullu atuarfinni ingerlanneqartarput, aammalu atuartunik akuliusimatitsisunik ilinniartitseriaaseqarluta” Aka Grønvold oqaluttuarpoq ilassutigalugulu Kivitsisa atuarfinni imatut sungiunneqartigisimasoq suliniutaannaajunnaarluni meeqqat atuarfiini ilinniarfissuarmilu pissusissamisoortutut isigineqalersimalluni.
Peqataanissamut periarfissagissaanerusoq
iPadit imminerminni soqutiginanngillat, sakkussaappulli nutaanik ilisimasaqalernissamut peqatigiinnissamullu, Kivitsisami siulersuisuni siulittaasoq isumaqarpoq. “iPadi siunertaanngilaq – meeqqalli atuartut ilikkariartornissaanut sakkussaavoq kivitseqataassutaassallunilu, tassami Kivitsisami tunngaviuvoq atuartut misissuissasut, pilersitsissasut, saqqummiissasut eqqarsaatersuuteqassasullu – taamaaliornissamullu iPadi aqqutigalugu sakkussarpassuaqarpoq allaatit pappilissallu inugaannik,” Aka Gønvold nangippoq erseqqissarlugulu TUSASS aamma ATTAT aqqutigalugit nuna tamakkerlugu internetikkut attaveqaatit pitsanngornerini tamanut periarfissat annerulersut.
Periarfissat taakku iluaqutigalugit ilaatigut Kivitsisami Ilinniarfissuarmi ilisimatusartut peqatigalugit alimasissumik atuartitsisalernermik kinguneqarput. “Taamaaliornikkit meeqqat atuarfii naligiinnerulerput, maannami avannaani nunaqarfimmiuugaanni kujasinnerusumiluunniit illoqarfimmi annerusuminngaanneeranni assigiimmik ilinniarsimasumik ilinniartitsineq pisinnaavoq,” Aka Grønvold, Kivitsisami taamaalilluni nunatsinni nunaqarfinni isorliunerusuni ilinniartitsisussaaleqinermut iluaqutaasinnaanera pillugu nuannaarutigalugu oqarpoq.
“Taamaalilluta digitalikkut aaqqissuussaani ukiuni arfinilinni ilusilerneqarsimasoq meeqqanut inuusuttunullu pitsaanerusumik periarfissiivoq. Maanna attatiinnarnissaat alimasissumillu atuartitsinerup ineriartortinnissaa tullinnguuppoq,” siulersuisut siulittaasuat oqarpoq.
Alimasissumik ilinniartitsinerup saniatigut peqataanissamut periarfissat Kivitsisap suliniutaani allatigut aamma qitiusumik atorluarneqartarpoq. “Atuatunut siornatigut ilinniarsimasunt ilinniartitsisoqarsimanngitsunut iluaqutaavoq. Aammali meeqqat atuarniarnerminnut allanniarnerminnullu aammalu oqalunniarnermikkut sapersartartunut periarfissiilluarpoq. Tamanut iluaqutaavoq,” Aka Grønvold erseqqissaavoq oqaluttuarlunilu Meeqqat atuarfiini atuartunut amerlasuunut nunarsuaq ammaanneqartoq.
Suleqatigiinneq alliartorlunilu pitsaaneruleraluttuinnarpoq
Meeqqat atuarfiini atuartut amerlanerusut sumiiikkaluarunilluunniit peqataanissamut periarfisaqarnerulernerannut peqqutaavoq kommunit tallimaasut tamarmik suleqataammata. Ataatsimuussuseq immikkuullarissoq.
“Kivitsisa kisiartaalluni kommunini tamani taamatut suleqatigiissuttaavoq. Pisariaqartipparpullu suleqatigiinneq tamanna. Kalaallit Nunaanni atuartitsineq meeqqallu atuarfianik ataatsimoortitsivoq. Tamanna asseqanngilluinnarpoq misigaarpullu kommunit Kivitsisa pillugu suleqatigiissuseqarluartut.,” Aka Grønvold oqarpoq, tassanilu Kivitsisami anersaaq pillugu – tassa ataatsimoorluni kivitseqatigiiinneq. Kommunit, atuarfiit, illoqarfiit nunaqarfiillu akornanni kivitseqatigiinneq.
“Kommunit, Ilinniartitaanermut Aqutsisoqarfimmut ilinniarfissuullu akornanni suleqatigiilluarneq ersarippoq. Suleqatigigiinneq qaninnerulerlunilu nukittunerulerpoq, tassanilu ilinniartitseriaatsit pamersaanerlu oqallisigilluartarpagut,” Aka Grønvold oqaluttuarpoq, iluatsillugulu suleqatigisartakkatillu suleqatigiilluartarnerminnut ammasumillu eqqartueqatigiittarnerminnut qujaniarluni. Aammattaat erseqqissarpaa Kivitsisap siunertarimmagut atuarfiit ammanerulissasut.
“Kommuniuppata, aqutsisoqarfiuppara, suliffeqarsiuppata peqatigiiffiilluunniit, atuartut attavigisinnaavaat. Atuarfiimmi ammanerulernissaat nunarsuullu qaninnerulernissaa ataatsimoorluta kivitsissutiginiarparput. Kivitsisamut tunngasuinnaanngilaq. Siunertaavorli maanna tunngaviusoq ineriartussasoq, meeqqammi atuarfiat ataatsimoorluta susassaqarfigaarput,” Aka Grønvold erseqqissaavoq.
Atuarfiit Kivitsisa atuartuutiminnut nalimmassassavaat
Sumiiffigisami piginnittuussuseq tassaavoq Kivitsitami pingaartitat ilaat – atuarfiit Kivitsisa aallaavigalugu atuarfimminnut nalimmassarnissaat,
“Kivitsisa atuarfinni assigiinngitsuni assigiinngitsunik isikkoqarpoq. Atuarfiit tamarmik assigiinngitsuupput. Taamaammat aamma atuarfiit ataasiakkaat nammineq periusissaminnik nassaassapput. Kivitsisa atuarfinni assigiinngitsuni nammineq inuuneqassaaq,” Aka Grønvold, atuarfinni ilinniartitsisunik suleqateqarnerminnik qanorlu ikiortit allanngueqataasutit atuuteqarnersut tulluusimaaruteqartoq, oqarpoq.
“Atuarfinni ilinniartitsisut, aqutsisut ikiortillu suliaannut immikkuullarissumut suleqatigiinnerannullu nersualaagassarujussuupput. Atuarfiit Kivitsisa sumiiffimminnut tulluarsarluarsimaqaat. Ilisimasat isumassarsiornerullu ikiortit ingerlateqqittagaat ilinniaritsisunut sunniussimavoq pitsaanerpaamillu atuartitsinermik avatangiiseqarnermik pilersitsinissamut kajumititsilerlunilu nukissaqalersitsisimalluni. Kivitsisa sumiiffinni assigiinngitsuni ingerlannissaanut pisariaqartitat assigiinngillat,” Aka Grønvold, allattoqarfimmi Kivitsisallu siulersuisui peqatigalugit atuarfinni ataasiakkaanik ineriartornermik nunatsinnilu atuarfeqarfimmik ineriartortitsinissamik ingerlatitseqqinnissamut qilanaaruteqartoq, oqaluttuarpoq.