Kivitsisamit iPadsinik atuartunut ilinniartitsisunullu tamanut tunniussivugut Tusass-imit ATTAT-millu ikiorneqarluarluta atuarfinni tamani internetikku attaveqarniarneq pitsaanerulersillugit. Maanna periarfissat taakku nutaat qanoq atorluarsinnaanissaat pingaartipparput.
Tassaniipput piginnaanertusarnerit, ilinniartitsisunullu qanoq ililluta atuartut alisissumik ilinniartissinnaanerlugit naleqqutsillugu onlinekkut sungiusaaneq – ataatsimullu isigalugu atuarfiit akornanni qanoq avitseqatsigiittoqarsinnaallunilu suleqateqartoqarsinnaanersoq.
Suliat ilaat Kivitsisami pilersinneqartarput, allalli sumiiffinni pisoqarfiusut aallaavigalugit pilersinneqartarlutik. Taamaattut ilagaat Upernaviup eqqaani nunaqarfiit Innaarsuit aamma Kangersuatsiaat aamma Ilulissani Atuarfik Jørgen Brønlundimi ilinniartitsisoq Nuka Jensen.
Suleriuseq nutaaq
Nuka ikiortiuvoq, taamaammallu suleqatiminik ikiuissalluni ikorfartuissallunilu sungiusimavaa – nammineq atuarfimmini aammali kommunerisami nunaqarfiisa ilaanni. Taakku saniatigut alisissumit aamma ilinniartitsisuuvoq.
Nuka suleqatinilu Akisoq Cortsen nutaamik suleriusissiorsimapput taasaminnik “iPad-imut ullorititaq”. Tassani ilinniartitsisunik ilinniartitsinatik atuartunik ilinniartitsipput. Nuka Innaarsunnik Kangersuatsiaanilu atuarfiit isumaqatigiissutiliorfigai. Tassani atuartut iPadit pinngorartitsinermi , pinnguarnerni ilinniarnermilu qanoq atorsinnaaneraat ilitsersuuppai. Fagini tamani atorsinnaasaannik sakkussalersorpai.
iPadimut ullorititanik kingullerni atuartut nunaqarfinnit marlunneersut ataatsikkut ilinniartippai. Oqaluttuaraa:
“Aatuartut atuarfinni marlunneersut Zoom-ikkut katersuutsippakka, tamannalu iluatsilluarsimasoq utertiffigineqarpunga. Naak nunaqarfiit tamarmik Upernavimmiup eqqaaniikkaluarlutik ungasikkaluaqisut imminnullu takorpiarneq ajoraluartut”.
Ilikkakkagut akunnitsinni ingerlateqqittarpagut
Kivitsisami eqqarsaat pingaarutilik tassaavoq ilikkakkatsinnik akunnitsinnut ingerlatitseqqiinissaq. Ikiortut pikkorissartuartarlutillu workshopertuartarput, taakkulu paasisaminnik atuarfimminni suleqatiminnut ingerlatitseeqqittarput. Kivitsisami piginnaanertusaanerit amerlanerit suliaapput. Tassunga peqqutaavoq ilikkakkanik ingerlatitseqqiinermi ilinniarnarnerusarmat. Nuka tassa taamaaliorpoq iPadinullu ulloqartitsigaamani tamanna atortarlugu.
Ingerlatsinermini atuartut angajulliit ilinniartittarpai. Kikkulli tamarmik ilikkagaq nutaaq atortariaqarpaat. Taamaammat ilinniartitsinini naammassigaanga atuartut minnerit isertinneqartarput, angajulliillu ilikkakkatik taakkununnga ingerlateqqittarpaat.
“Onlinekkut takunissaat qilanaariuaannarpara. Taamatut ilinniartitsineq nukissanitsitsisaqaaq. Ukioq atuartitsiffiusoq aallartippat augustimi taamatut naapinnissaq isumaqatigiissutigereerparput”