Atuarfik Tuiisami 1. klassit oqaluttuanik suliaqarput. Tamanna assigiinngitsorpassuartigut pisinnaavoq, ilinniartitsisuallu, Bodil Mona Frederiksen, nutaamik misileerusussimavoq. Atuartut pinngorartitsinerulersikkusullugilli alapernaannerulersikkumavai atuartullu peqataatinniarlugit. Namminneq soqutigisaat aallaavigitinniarsimavaa.
iPadit iluaqutaasa ilagaat paasisat pinngorartitsinikkut samminissaannut periarfissarpassuaqarmat. Kivitsisami multimodalitet, tassa saqqummeeriaatsit assigiinngitsut ataatsikkut suliarineqarsinnaaneri: Filmit, assit, nipit, allaqqasut il.il. eqqartukulavagut. Siammasissumik suliaqarsinnaalersitsipput malugissutsillu assigiinngitsorpassuit atorneqartarlutik.
Tigussaasunngortinniarlugu Bodil Monap atuartut oqaluttuaannut assit aallavigitinniarsimavai. Atuartut namminneerlutik assiliiseriarlugit kingorna aaqqissortippai. Taava nittartakkatigut assinik nassaarteriarlugit namminneq assilisaannut ikkussortippai. Inernerai collaget nuannersut tissinartullu. Assersuut assimi ataani takuneqarsinnaavoq.
Taava assit aallaavigalugit oqaluttualiortippai. Tassani qanoq ililluni pitsaasumik oqaluttuaq ineriartortinneqarsinnaanersoq sammineqarpoq, atuartullu takorluuisinnaanerat killilertinneqarani.
Oqaluttuap ingerlaqqinnera
Tassanngaanniit alloriarfissat amerlapput. 1. klassemi atuartut suli namminneerlutik allassinnaanngilaat, oqaluttuarisinnaammatigilli – sooq taava immiutiinnarsinnaanngilaat? Kingorna immaqa nipit tiguaaniutit ikkussorneqarsinnaassapput oqaluttuallu imminnut siammarsinnaassavaat, assit illarnartut isiginnaarlugit oqaluttuarlu oqaluttuanut tunngasut ilikkakkatik aallaavigalugit feedbackerfigisinnaallugit.
Ingerlariaaseq taanna pisariunngilaq piareersarujussuartariaqaranilu. Atuartut ilinniartitsisullu teknikkikkut piginnaanerat annertusariaqanngilaq pisariillunilu. Atuartulli pinngorartitsisinnaanerat, takorluuisinnaanerat oqaluttuarnerullu nuannersua nutaamik misigissavaat, tamakkuuppullu Bodil Monap kissaatigisai.