Ulluni pingasuni ikiortit 90-init amerlanerit Nuummi Naapiffiup ingerlanneqarnerani workshopernernut, saqqummiussisunut ilinniarnermullu peqataapput. Peqataasussalli tallimaasut Nuummut tikissinnaasimanngillat ikiorneqarnermikkulli angerlarsimaffimminnit peqataasinnaasimapput assiliivik, nipi chatilu atorlugit.
“Qilanaarsimaqaanga. Ataatsimeersuarnernut imaattunut peqataaneq nuannarisaqaara,” Najannguaq Olsen, 2018-imi ikiorteqalermalli peqataasarsimasoq oqarpoq. Marlunngorneq 31. Oktobarimiit sisamanngorneq 2. Novembari ikiortit 90-t sinnerlugit workshopernernut, saqqummiussisoqarneranut ilinniartinneqarnerannullu peqataapput.
“Aqagumut Ilulissaniit Nuummukartussaallunga unnukkut ernera napparsimalerpoq angerlarsimaannartariaqalerpungalu,” ikiortiusoq sungiussilluarsimasoq oqaluttuarpoq, nassatassaraluanilu puiaqqiinartariaqarsimavai. Kivitsisali asuliinnaq alisissumik ilinniartitsisanngilaq, taamaammat Najannguaq Olsen Ilulissani angerlarsimaffimminit Naapiffimmi peqataasinnaavoq – peqataasut allat 90-iusut ataatsimeersuarnermi naligingajallugit.
“Allaanngilaq ornigulluni peqataaginnarluni. Soorunami nalinginnaasumik peqataanermik allaaneruvoq. Iluatsilluaqaarli ornigussinnaanngitsut pissarsiaqarsinnaanerat eqqarsaatigineqarsimammat,” Najannguaq Olsen nassuiaavoq.
Kivitsisamiimmi ornigullutik peqataasinnaanngitsunut ikiuutaasinnaasumik inummik ataatsimik sulisitsisimapput.
“Ataatsimeersuarnissaq ullualunnguit sioqqullugu ikiortit pingasut sila peqqutaalluni tikissinnaanngitsut paasinarsivoq. Tassani akisussaassuseqarluta misigaarput, Kivitsisami ilaatigut alilissumit atuartitsinerumut tunngasuuvoq. Taamaammat ornigullutik peqataasinnaanngitsut peqataatissinnaajumallugit malinnaatitsiniassagatta sulisussarsivugut. Taassuma pikkorissaqataasutut misigititsinissaq alisissumillu ilinniartinneqarnissaat isumagivaa, pissarsiaqartikkumallugit,” Rune Nydam Bundgaard, Kivitsisami suliniummi aqutsisoq oqaluttuarpoq.
Lasse pitsaasumik mikrofinilersorneqarlunilu webcamilerneqarpoq, ingerlanerullu nalaani suliakkiunneqartut digitaliusumik peqataasunut tulluarsarlugit nalimmassartarlugit.”.
“Iluaqaaq. Pingaaruteqartutut takuneqartutullu misigititsivoq, uanga ikiortillu allat pillugit taamatut aaqqiisinnaammata. Assut kajuminnarpoq,” Najannguaq Olsen, annerusumik 5.-7. klassini matematikimi assassornermilu, taakkualu saniatigut 2. klassertut danskimi ilinniaritsisuusoq, oqarpoq.
Digitalisut pimoorunneqassapput
Nutaarsiassaajunnaariartorpoq alisissumik atuartitsineq unammillernarsinnaammat. Tamanna meeqqat atuarfiini ilinniarititsisut atuartullu paasereerpaat. Klassinik atuartitsineq mediamut digitaliusumut nuuginnarneqarsinnaanngilaq. Taamaammat ukioq manna Naapiffimmi teqeqqumi webcamimik ikkussisoqaannanngilaq alisissumik atuartitsinermi.
“Soorlu atuarfinni alisissumik atuartitsinermi ilinniartitsisutut atortorissaarutit digitaliusut pimooruttariaqarpagut. Ataatsimeersuarneq hybridisaavoq – tassa ornigullutik digitaliusumillu peqataasut eqqarsaatigisariaqaratsigit – imaaliallariaannaanngilarlu,” Rune Nydam Bundgaard erseqqissaavoq nangillunilu:
“Maannamut assigiinngitsorpassuartigut Ikiortit Naapiffik ingerlattarsimavarput. Katersuunnerit ornigulluni imaluunniit digitaliunersut apeqqutaasarput aaqqissuunnerannut. Uanili aaqqitassaqarpallaarsimanngilagut. Suliassat nalimmassalaarneqarput, peqataasut suliaat allatulaaq siammarneqarlutik – suliassallu ilaat app’it allat atorlugit suliarineqartariaqarlutik. Tamakkuli atuarfinni pikkorissaatitsinnilu misilittagaqarfigilluarpagut”.
Immitsinnut ilikkassaagut
Pilunnguaq E. Olesen tassaavoq ilinniartitsisut pikkorissut ilaat iPadit atorlugit ilinniartitsinermik, 2019-imili ikiortinngoramili misilittagaqarlualersimasoq Sisimiuni Nalunnguarfiup atuarfiani ilinniartitsisuusoq ornigullunilu ataatsimeersuarnermut peqataasut ilagaat.
“Ornigulluni katersuunneq pissarsiaqarnartuaannarpoq. Ikiortit allat ilisarisimalertarpagut ikiortitullu ilisimasatsinnik misilittakkatsinnillu avitseqatigiittarnigut pissarsiaqarnartuaannarput. Allat atuarfimminni qanoq ilinniartitsisarnersut oqaluttuartarnerat paasisaqarnartaqaaq. Nammineq sulinermi qanoq iliorsinnaanerluni isumassarsiaqarnarlunilu eqqarsartitsisarpoq,” Pilunnguaq E. Olesen, ilamik angerlarsimaffimminnit peqataasariaqarnerannik ilisimannittoq oqarpoq.
“Suliagut tamaasa peqataaffigigaat takusinnaavarput – workshoperniit ataatsimut sammisaqarnitsinnut. Iluatsilluaqaaq,” Pilunnguaq E. Olesen, nukarlerni Kalaallisut, danskimi, engelskimi, matematikkimi, pinngortitalerinermi, assassornermi aammalu inuttut ineriartornermi ilinniartitsisoq, ilaliivoq.
Naak Nuummi peqataaniarluni aqqutaa peqataasussanut ungasissuliartariaqartaraluartut Kivitsisallu suliniutip 2019-imili aallartikkami alilissumik atuartitsisarnera ukiut tamaasa pitsanngorneruleraluttuinnaraluartoq ornigulluni peqataasarnerit piuinnarnissaat pingaaruteqarpoq.
“Digitaliusumik attaveqaatit pilersinnissaat ajornakusoorsinnaasartoq ilisimavarput – attatiinnarnissaasali ajornannginnerat nalunngilarput. Naapiffeqarnerani attaveqaatit pilersarput, taakkulu webinarertitsinerni digitaliusunillu ilinniartitsinerni attatiinnartarpagut,” Rune Nydam Bundgaard oqarpoq.
Q&A
Naapiffik 2023-mit suliaqarnissinnut suut pissarsiaqaatigaasigit?
Ornigulluni peqataaneq: Pilunnguaq E. Olesen, Nalunnguarfiup Atuarfia, Sisimiut.
“Ilisimasakka nutarterput, uterpungalu suli Naapiffimmi ilikkakkakka atuarfimmi suleqatinnut ingerlateqqinnissaannut piumassuseqarneruleqqallunga. Pikkorissarninni immikkut taasinnaavata “Edufit” skoletube.dk -miittoq, aammalu Canva Book Creatorillu suleqatigiissinnaanngornerini torraanerusumik atuagaliortitsisinnaanera. Taaajjy atuartitsininnut iluaqutigissaqaakka.“
Digitalimik peqataaneq: Najannguaq Olsen, Ilulissat.
“Workshopernerit sivikinnerulaarput taamaalillutillu sivitsortooratik. Atuartitsininni atorsinnaaqaakka ingerlateqqissallugillu. Ikiortit pikkorissinerusimaneri malugaakka – soorlu teknikikkut tunngasut nangiarineqarpallaarsimasut. Ukiut tamaasa pitsanngoriartornera ersareqaaq.
