Nutaarsiassat

Nutaaliorta.gl-imi Ivaaq Kriegelimit ilitsersuunneqarneq

February 4, 2025

Ivaaq Kriegelimut ilitsersuunneqarneq aqqutigalugu ilinniartinneqartuaannarsimavoq. Taamaalilluni ataataminit ilikkagaqarsimavoq namminerlu meeqqaminut taamatut ilitsersuussisarluni. Inuutip eqqumiitsuliortut pingasuusut, Ivinguak Stork Høegh, Lena Augusta Olsen aamma Inuuteq Storch Nutaaliortami atuartitsissutinermi ingerlatsinerit pingasuusut Nutaaliortami nuna tamakkerlugu atuartunut ilitsersuutaatussat suliasisimalerpaat.

Ivaaq meeraagallarami piniartillutik ataatani isigisarpaa. Puisit aallaasalinngikkallaramigit naseqataasarpoq. Aataap anersaarani qanoq sivisutigisumik immap iluaniissinnaanera maluginiartalerpaa, anersaarniarlunilu puisarneri sumiinnersut aamma naatsorsorsinnaalerlugit. Puisit tuttullu pisarineqartarneri, puisit pilanneqartarneri tuttullu aattorneqartarneri isigisarpai.

“Ataatama qanoq iliornissannik nassuiaassisarnera eqqaamasaqarfiginngilara. Ilimagaarali taamaaliortarsimassasoq, eqqaamanerpaavakkali isiginnaartarnera ilikkarfiginerusarakkit. Taava siullerpaamik kisimiillunga piniariarama suut tamaasa sapinngilakka”

Ivaaq Kriegel

Ivaaq Kriegel Aasianni inunngorpot inuunermilu annersaani Nuummi najugaqarluni.

Ullumikkut Nunatta kulturikkut illorsuaani Katuami pisortaavoq Ilinniartitsisutut aammalu IKT-mi ilikkariartornermilu mastereqarpoq. Siornatigut Ilisimatusarfiup iluani ilinniartitsisunngorniarnut ilaatigut eqqumiitsuliornermi, sananermi aamma it-didaktikkimi ilinniartitsisuusimavoq.

Nutaaliortami ingerlatsinerit pingasuusut Kivitsisa pillugu peqatigalugulu suliaapput.

Nutaamik ilitsersuunneqarneq

Ilitsersuunneqarneq ilisimasalimmit ilinniarneruvoq. Ilikkagaqassagaanni kisianni tassa ilaarlugu. Ivaap nassuiarpaa ileqqut assassorlunilu suliaqarneq kingornuttagaasoq. Ajoraluartumilli atuarfimmi issuaaneq pissusissamisoortutut isiginiarneqarneq ajorpoq. Titartaasoq ilaarneqaqqusaanngilaq. Tamannalu kukkunerusoq Ivaaq isumaqarpoq. Tassami assammik pilersitat taamatut ilikkarneqartarput. Taamaammat Ivaap atuartitsinermi ingerlatsinernik pingasunik ineriartortitsisimavoq, tassani atuartut eqqumiitsuliortunit ilitsersuunneqassapput. Taamaalilluni qangatut ilisimasanik tunniusseriaaseq atuartitseriaaseqarnissamut nutaaliaanerusumut sinaakkusiorpoq. Atuartitsinermik ingerlariaatsini tamani eqqumiitsuliortoq suliaqarnerani malinnaavigineqassaaq. Ivinguak Stork Høeghip atuartut collageliornermini pinngorartitseqatigissavai, Lena Augusta Olsenip atuartut marriornerminik takutitsissaaq, kiisalu Inuuteq Storchi qanoq ililluni assiliisarnerluni assilissallu atorlugit qanoq oqaluttualiortarnini takutissavai. Atuartitsissutiliat videuliaapput, taakkulu atuartut isiginnaarlugit isumassarsiorsinnaapput misileraanissaminnut. Ingerlatsinerit naggataanni atuartut namminneerlutik pilersitsisimassapput: Tiitorfik, collage aamma atuagaq assilissanik imalik. Ingerlatsinerni atuartut suliaqaatigalutik videut isiginnaassavaat. Collageliornermi ingerlatsinermi assersuutigalugu Ivinnguup suliaqarnera malinnaavigissavaat. Assani qanoq atortarnerai takusinnaavaat, siuartillugu kinguartillugulu, teknikkiisalu ilikkarnissaasa tungaannut ilaaqattaarlugit.

“Atuartut assassorluni sulineq ilikkaqqaassavaat. Teknikit ilaat ilikkaraanni ilisimasalik ilaarneqassaaq, taamaasilluni nammineq ineriartortitsinissamut, sunniinissamut pinngorartitsissamullun sakkussaqalerniassagamik. Tassa taakkuupput ingerlariaatsit isumaat” Ivaaq Kriegel oqaluttuarpoq.

Atortussiat misilissigit - piffissaqarluarfigillugillu

Atortussiat tamarmik nittartakkakkut Kivitsisap atortussianut attaveqaatitaatigut, nutaaliorta.gl aqqutigalugu nassaarineqarsinnaapput.

“Digitaliusumik suliarinerisa immikkuullarissutigaat allaat ilisimasallit nunatsinni avinngarusimanerpaaniittut isigineqarsinnaammata. Ilinniartitsisut taamaallaat apeqqutaalerput atorniarnerlugit.”

Ivaaq oqarpoq atuartunullu atortussianik misilerarnissaamut innersuussilluni. Ingerlatsinerit ilaat ilinniartitsisit aqunneqarnerusussaapput – taakkununngalu peqqissaarussanik ilinniartitsisunut ilitsersuutitaqarput. Ingerlatsinernut pingasuusunut atuartut itisilerinissaat piffissamik atuiffiusariaqarpoq. Suliamik ingerlatsineq misiginissaat akuerisariaqarpoq.

Atuartut naammassigunik pingaaruteqarpoq pilersitamik naleqassusaasa misiginissaat. Collaget saqqummersissigit, atuakkat assilisanik imallit nittarsaassigit tiitorfiliaallu tunissutissanngorlugit poortorlugit. Ivaap pingaartuusorivaa:

“Puisimik tuttumillu perngarnikka ilaquttanni persuarsiuutigineqarput aamma”