Imminut pilersorneq atuarfimmi sammisassatut nunalu akimorlugu nuannisarneq
Illarasaarneq, tiguartisimaneq soqutiginnillunilu isiginnaarneq, tamakkuupput atuartut 200-t sinnerlugit naatitseqqaarmata misigisat. Naatitsisa aallartinnera taamaappoq – naatitassaaqqat, imminut pilersorneq ataatsimuussuserlu pillugit atuartitsineq. Nuna tamakkerlugu peqataasoqarpoq, Ittoqqortoormiiiniit Qaamaanut atuaqatigiiaat 32.t nittartakkakkut pisoqartitsinermi kick-off-imik taaneqartumi peqataapput. Naatitassaaqqanik ikkussipput, filimiorlutik saqqummiussillutik allarpassuillu. Nalunaaquttap akunnerini pingasuni nuna tamakkerlugu atuartut ataatsimut atuaqatigiipput.
“Skærmikkut allanit atuartinneqarluni nuanneqaaq, ilinniartitsisutsinniinnaanngitsoq” Minngortunnguup Atuarfiani atuartut ilaat 7. klassemiittoq, pisup kingorna oqarpoq
Piffissaq ataatsimoorfiusoq
Naatitsisa aqqutigalugu nuna tamakkerlugu atuarfiit tamarmik atuaqatigiinnut naatsisivissanik naatitsinermilu qaammaqqutitallit, naatitassaaqqat angerlarsimaffinnilu ilaqutariinnut naatitsissutissanik pinikuupput. Taakkulunnga akullerni atuartuni atortussiat imaqarluartut aamma ineriartortinneqarsimapput, taakkulu faagini assigiinngitsuni atugassiaapput. Tamakku tamarmik ataatsimoorluni pisoqartitsinermi aallartisarneqarput.
Pisumi soqutiginarnerpaasoq tassaavoq Sisimiut Fresh Farm-imit nittartakkakkut peqataasoqarnera, tassani Palli Lyberthi naatitsivimminni, ukioq kaajallallugu salatinik pilersuisarfimminni takornariartitsimmat – taassumalu nunatsinni naatitat atorlugit imminut pilersorsinnaaneq qanoq iluatsitsisoqarsinnaanersoq takutippaa.
Naatitanik aamma imminut pilersorsinnaavugut
Piniarneq aqqutigalu imminut pilersorneq sungiusimavarput. Aalisakkat tuttullu nammineq pisarisarpagut aammalu nulialluta pilisarluta. Naatitsisami naatitanik imminut pilersorneq nukittorsarparput. Naatitaaqqat naatissallugit pisariinnerummata, naalertortarmata mamarlutik vitamineqarluarmatalu toqqarneqarput. Atuaqatigiit naatitassaaqqanik ukioq naallugu naatitsisinnaapput – aamma pisiniarfinni naatitat nutaat amigaataalerpata.
Sapaatip akunnerata iluinnaani eertat, radiisit, broccolit imaluunniit solsikkinit naatitaaqqat siulliit piiarneqarsinnaasarput. Atuartitsinermi sammisaqartitsinerup ilaatut ilaatigut pisiniarfiup inuussutissanik tikisitsisarnera, imminut pilersortut apersorneri, alliartortitsinermi nalunaarsuinerit, naatitaaqqanik nerisassiorneq ooqattaarinerlu sammineqarsinnaapput, misilittakkatillu suna tamakkerlugu siammartersinnaavaat. Kick-off-imi pisoqartitsineq aallartissutaannaavoq – tassanngaanniit atuartut pinnguarsinnaapput, ilinniarlutik nunatsinnilu iluaqutaasussamik naatitsinermi aallartitseqataasinnaallutik.
Atuartut qitiutillugit pisoqartitsineq digitaliusoq
Ataatsimut isigalugu Kivitsisap siunertarivaa digitaliusumik attaveqaasersuineq, pamersaanikkullu isumaqarlutumik attaveqaasersuinerup atorneqartarnissaa. Sisamanngonermi ullaap tungaa tamakku tamarmik iluatsipput. Teknologi iluatsippoq. Taannalu aqqutigalugu atuarfiit atuartullu ataatsimoorlutik ingerlatsipput. Nuna tamakkerlugu atuartut iserfissami ataasiusumi isersimaqatigiipput, pilersitaallu naatitsinermi ataatsimoorfiusumut ilaalerput. Atuaqatigiiaani ilinniartitsisut pisumi ikorfartuipput atuartullu ingerlatsinissaannut pilersitsinissaannullu inissaqartitsillutik.
“Atuaqatigiiaarpassuit taamak amerlatigisut peqataanerat nuannerpoq. Peqataasut allat sumiiffii saqqummermata atuartut assut qiimmaatsapput. Skærmikkut atuartinneqarnertik assut tiguartisimaffigaat, uangalu ilinniartitsisutut malinnaaginnarpunga”, Juliane Davidsen, Sisimiuni Nalunnguafiup Atuarfiani ilinniartitsisoq oqarpoq.
Suleqatigiinnermi annertuumi pingaarutilimmilu pilersinneqarpoq
Naatitsisa najukkani imminut pilersortut, ilungersuussilluartut, aallartisaatut atortussianillu ineriartortitsisut qanimut suleqatigiinnerannit pilersinneqarpoq. Ineriartortitsinermi EduDesigns-imeersoq Maja Holdorf, suliniummi suliaqartut suliaqarneranni ataqatigiissaarisuullunilu webinarernermi saqqummiussisut ikorfartorpai isumassarsiallu atuartitsinermi sammisassanngortinneqarnissaat atortussianngortinnissaallu piviusunngortippai.
Ilinniartitaanermik Aqutsisoqarfiup Kivitsisallu suleqatigiinnerat Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit, Sunflux-imit aningaasaateqarfinnillu Kivitsisamik aningaasaliisunit taperneqarnikkut pilersinneqarluni suli nukittunerulerpoq. Suleqatigiinnerit taamaattut ataatsimoorluta meeqqat atuarfiinik ineriartortitsiniarutta atuartitsinerlu naleqquttoq piujuartorlu pilersinniarutsigit aalajangiisuuppuut.
Naatitsisap takutippaa najukkani nukit, suliassaqarfimmi ilisimasat teknologilu digitaliusoq ataatsimoortikkutsigit meeqqat atuarfiini periarfissarpassuit nutaat puttussuutilersinnaasut.
Naatitsisa naatsumik oqaluttuaralugu
– Naatitsisa akullerni atuartitsissutaavoq naatitassaaqqat, naatitsineq imminullu pilersornermut tunngasoq.
– Suliniut Kivitsisap Ilinniartitaanermullu Aqutsisoqarfiup najukkani imminut pilersortut atuartussiortullu suleqatigalugit ineriartortinneqarpoq.
– Nuna tamakkerlugu atuarfiit tamarmik atuaqatigiinnut naatitsissutinik naatitsinermi qaammaqqutinik LED-linnik, naatitassanik, ilitsersuutinik angerlarsimaffinnilu ilaqutariinnut naatitsissutissanik imallit nassiussarsiarinikuuaat.
– Sisamanngorneq 18/9 2025 atuaqatigiiaat 32-t 200-t sinnerlugit atuartunik inuttallit ataatsimoorlutik pisumi kisk-off-imi digitaliusumi peqataapput.
– Pisoqartitsinermi saqqummiisoqarpoq, atuartut suliaqarput, sakkussat digitaliusut atorneqarput, filmit isiginnaartinneqarput digitaliusukkullu Sisimiut Fresh Farm pulaartuullutik.
– Naatitsisa akunnerni faagini assigiinngitsuni atuartitsinermi sammisassarpaalunnik imaqarpoq. Taakku uani takuneqarsinnaapput: https://nutaaliorta.gl/akulliit/naatitsisa/
Suleqatigiinnitsinnut uku qujaffigerusuppagut:
• Maja Holdorf, siunnersorti, EduDesigns-imi ilinniusianik ineriartortitsisoq
• Bent B. Olesen, isumassarsisoq ukiorpassuarnilu imminut pilersortoq
• Kim Neider, Upernaviarsummi misileraavimmi naatsiivilerisuusimasoq
• Palli Fleischer Lyberth, namminersortoq Sisimiut Fresh Farm-imilu piginneqataasoq
• Maja Holdorf, siunnersorti, EduDesigns-imi ilinniusianik ineriartortitsisoq
• Ane Fleischer, Ilinniartitaanermut Aqutsisoqarfimmi pinngortitalerinermi matematikkimilu atuartitsinermut siunnersorti
• Ane-Kathrine Petersen, Ilinniartitaanermut Aqutsisoqarfimmi IT-mi siunnersorti
• Maren-Louise Dalager, Ilinniartitaanermut Aqutsisoqarfimmi kalaallisut siunnersorti
• Martha Nielsen, Ilinniartitaanermut Aqutsisoqarfimmi atuarnermi siunnersorti aaqqissuisorlu
• Nina Kreutzmann Jørgensen, Ilinniartitaanermut Aqutsisoqarfimmi danskimi mernguernartunullu siunnersorti
• Rune H. Kristiansen, Ilinniartitaanermut Aqutsisoqarfimmi immikkut siunnersorti