Ukiumi atuarfiusussap aallartinnerani Kivitsisamit nunami atuarfinnut tamanut MakeDo-t nassiussuunneqarput. Sakkussanik taakkuninnga atuartut ilaatigut modelliliorsinnaapput, faagimut tunngasunut paasiniaasinnaallutik, namminnerlu aaqqissutissanik misileraallutik. MakeDo-ginnaanngillalli. Atuartitsinermut atortussiat pikkorissarnerillu ineriartortippagut, atuartitsinermullu siunnersortit ilinniarititsisut ikiorlugit sakkussat atuartitsinissamut atoruminarsassavaat.
Qanoq ililluni ninngusuumik ikaartarfiliortoqarsinnaava? Qanoq ililluni modelip oqaluttuami inuttap pingaarnerup paasisaqarfigisimaneranik takutinneqarsinnaava? Qanorlu ililluta qivernerup teqeqqorissuunera paasissavarput?
MakeDo atorlugit atuartut apeqqutit tamakkua suliarisinnaavaat isumassarsiaminnillu tigussaasunngortitsisinnaallutik. Pinngortitalerinermi ikaartarfiliorsinnaapput, ninngussusaanik misileraallutik misissorlugulu sanaartukkat ilaat sooq allanit pitsaanerusarnersut. Oqaatsinut faagini inuttaasup pingaarnerup illua sanasinnaavaat allallutillu sooq taamatut toqqaasimanertik nassuiarsinnaallugu. Matematikkimilu qivernerit uuttortarneqarsinnaapput, sananeqarlutik misilerarneqarlutiilu.
Siulleq ilutsinngippat, atuartut misissorsinnaavaat sooq, allanngorlugu misileqqillugulu. Suliassani suleriutsinut tamanna ilaavoq.
Sakkussaniit atuartitsinermut
MakeDo peqatigalugit faaginut klassinullu assigiinnitsunut atuartitsinermut atortussiorpugut. Ilinniartitsisut suliassanik tigussaasunik, namminneq atuartitseriusertik aallaavigalugu nalimmassarsinnaasaminnik, nassaarsinnaapput. Aamma Kivitsisa Akademiippoq MakeDo-mi pikkorissarneq.
Sananertaa pappimik sakkussanillu pisarpoq, iPad’ili aamma atorneqarsinnaavoq. Atuartut assersuutigalugu suliatik uppernarsarsinnaavaat sananerminniluunniit misileraanertik filmiliarisinnaallugu.
Ilinniartitsisut namminneerlutik MakeDo misilippaat
Minngortuunnguup Atuarfiani Sisimiuni ilinniartitsisut namminneerlutik Makedo misilittarpaat, Kivitsisamiik atuartitsinermi siunnersorti Pilunnguaq peqatigalugu.
Makedo-mi sakkut misilittarpaat, atuartunut atuartitsissutinilu assigiinngitsuni atorsinnaaneri misilittarlugit. Ilinniartitsisup Pauline Platou-p sakkussat atorluarsinnaaneranik periarfissanik takusinnaalluarpoq.
“Makedo atorsinnaaneranik periarfissaqarluarpoq. Projektilerinermi atuartitsinermilu sammisani assigiinngitsuni, aammali atuartut suleqatigiissinnaanermik, oqaloqatigiissinnaanermik allallu isumassarsiaannik inissaqartitsisinnaanissaannut periarfissiilluarput”
Kingullerlu nammineq workshoppimi misigisaqarfigaa.
“Prototypeliortussaalluta aallaqqaataaniilli takorluugaqarpunga qanoq isikkoqarnissaanik. Suleqatigiillutali aallartikkatta, allat isumassarsiaat inissaqartittariaqarsimavakka. Takorluukkanniik allaanerusumik naammassivoq – aamma ajunngilaq.”
Suleriuseq taannarpiaq, atuartut pikkoriffimminnik takutitsinissaanut periarfissiilluarpoq:
“Atuartoq atuagarsornikkut unammillernartuutilik imaassinnaavoq assassullaqqissuusoq, sapinngisaminillu takutitsinissaminut periarfissaqalersoq, taamaasilluni imminut tatiginerulernissaa aamma qaffassaataasinnaavoq.”
Atuarfinni atornissamut piareeqqapput
MakeDo maanna nuna tamakkerlugu atuarfinni tamaniilereerput. Ilinniartitsisut suliassanik ilitsersuutinillu nassaarsinnaapput, Kivitsisa Akademi pikkorissarsinnaapput atuartitsinermillu siunnersortitsinnit ikiorneqarsinnaallutillu isumassarsiortinneqarsinnaallutik.
Tassanngaanniit soqutiginarpoq takussallugu ilinniartitsisut atuartullu qanoq iliussanersut.
Makedo pisiarineqarlutillu aturarfinnut nassiuussuunneqarput Oak Foundation Denmark-imit taperneqarnikkjut
