Ilinniartitsisumit modeli

Ilinniartitsisumit modelip ilisarnaatai suuppat suullu iluaqutitarai?

Ilinniartitsisumit modelimi alisissumit atuartisisartup suliassaraa atuartitsinermi ingerlatassanik aallartitsineq, atuartitsinissamut sinaakkutissanik tapersersuineq aammalu sumiiffimmi ilinniartisisunut fagi pillugu siunnersuineq.
Alisissumit atuartitsisartoq Nunaqarfimmi modelimut Suleqatigiit modelimullu sanilliullugu ”siunnersortituunerusoq” sulissaaq. Tamannalu ilaatigut isumaqarpoq sumiiffimmi ilinniartisisoq Nunaqarfimmi modelimut sanilliutissagaanni atuartitsinissamut akisussaaffeqarnerusoq. Tassami sumiiffimmi ilinniartitsisoq pingaarnertut klassimik aqutsissaaq atuartunullu attaveqassalluni. Alisissumit atuartitsisoq atuartut nalinginnaasumik ilinniartitsisorisartagaanik atuartitsineq pillugu suleqateqassaaq.

Alisissumit atuartisinermi alloriarfiit arfineq marluk

Misilittakkanik katersinerni paasivarput, alisissumit atuartisinissamut periuseq, Ilinniaritsisumit modelimi aamma atorneqartartoq, arfineq marlunnik alloriarneqartoq.
Atuartitsinnginnermi, atuartitsinerup nalaani atuartitsereernerullu kingorna alloriarfiit arfineq marluk aqqusaarneqartarput. Modelimi ataani alloriarfiit ersarissarneqarput.
Alloriarfik 7-i alloriarfiit tamaasa aqqusaarpai, tassungalu peqqutaavoq nalilersuineq aatsaat naammassinermi ingerlanneqartassanngippat, ingerlaavartumilli alloriarfinni tamani ingerlanneqartassammat.
Alisissumit atuartitsinissassinnut modeli isumassarsiorfigisinnaaruttorissi?

Suleqatigiinnissamut aaqqissuussinissamullu eqqarsaatersuutit

Atuartitsinnginnermi, atuartitsinermi atuartitsinerullu kingorna suliassat

Ilinniartitsisumit modeli isumassarsiorfigalugu alisissumit atuartitsinermik ingerlatsiniarussi eqqarsaatigisariallit inissitassallu assigiinngitsut pingaaruteqarput.

Alisissumit atuartitsisartup sumiiffimmilu ilinniartitsisup akunnerminni ataatsimut atuartitsinissamut suliassatik suussusersisariaqarpaat. Taamaaliornikkut suleqatigiinnermi kina sunik suliaqassanersoq pillugu paatsuunganarsinnaasut avaqqunneqarsinnaapput. Annerusumik pingaaruteqarpoq alisissumit atuartitsisartup sumiiffimmi ilinniaritsisup qanoq qasugukkullut atuartitsinissaanut pilersaarusiornissamut erseqqissunik sinaakkusernissaa. Assersuutigalugu eqqarsaatigisinnaavasi:

Atuartitsinnginnermi, atuartisinermi atuartitsinerullu kingorna alisissumit atuartitsisussap suut suliassarai, sumiiffimmilu ilinniartitsisup suut suliassarai?
Atuartitsinermik kina aallartitsissava (ass. saqqummiinermik) – alisissumit atuartitsisoq imaluunniit sumiiffimmi ilinniartitsisoq? Paarlakaajaatissappat?
Qanoq qaqugukkullu sumiiffimmi atuartitsisup atuartitsinissaanut alisissumit atuartitsisartoq piareersaassava? Assersuutigalugu ullormi tassani imaluunniit ullut qassit sioqqullugit? Qanoq?
Sumiiffimmi ilinniartitsisoq atuartitsinnginnermi pilersaarusiortuaannassava?
Alisissumit atuartitsoq atuartitsinerup nalaani qanoq annertutigisumik atuartunut attaveqartassava?

Aqutsisup suliassaa

Aqutsisup qulaani suliassatut taakkartorneqartut pillugit aalajangiinissaq, qanorlu immikkoortut pingaarnerit sisamat sinaakkusersorneqassanersut akissussaaffigissavai.

Alisissumit atuartitsisartup misigisariaqarpaa sulinermini tapersersorneqarnissani, Ilinniartitsisumit modelili atorlugu alisissumit atuartitsisoq assersuutigalugu angajoqqaanut, atuartunut atuarfimmillu suleqateqarnissamut annertuumik attuumassuteqanngilaq. Taamaakkaluartoq angajoqqaat atuartullu susoqarnissaanik paasitinneqartariaqarput, tassami Ilinniartitsisumit modeli atorlugu ingerlatsinermi alisissumit atuartitsisartoq sulianut sunneeqataangaatsiarsinnaavoq, taamaakkaluartorli angerlarsimaffimmut attaveqartartussat tassaapput sumiiffimmi ilinniartitsisoq imaluunniit atuarfimmi aqutsisoq.

Alisissumit atuartitsisartup suliassai

Ilinniartitsisumit modeli atorlugu alisissumit atuartitsinermi fagimut tunngatillugu siunnersuineq ingerlanneqarnerusarpoq. Tassa imaappoq, alisissumit atuartitsisartup sumiiffimmi ilinniartitsisup alisissumit atuartitsinissaanut immersuisuusarpoq siunnersuisuusarlunilu.

Nalinginnaasumik atuartitsisoqarnerata nalaani alisissumit atuartitsisoq peqataaneq ajorpoq, taamaakkaluartoq taannaakkajuppoq atuartitsinissamut pilersaarusiortoq, aallartitsisoq naliliisuusorlu. Taamaattumik alisissumit atuartitsisoq atuartitsinermik ingerlatsinermi peqataaneq ajorpoq – sumiiffimmili ilinniartitsisoq atuartitsisarluni.

Sumiiffimmi ilinniartitsisup suliassai

Sumiiffimmi ilinniartitsisup klassimi atuartitsinissaq akisussaaffigisarpaa. Sumiiffimmi ilinniartitsisoq atuartitsinissaanut alisissumit atuartitsisartoq siunnersuillunilu isumasioqatigineqartarpoq.

Sumiiffimmi ilinniartitsisup atuartitsinissap pilersaarusiornissaa akisussaaffiginngilaa, nittartakkakkulli atuartitsisartoq atuartitsinissamut pilersaarusiussaaq, pilersaarusiornermili sumiiffimmi ilinniartitsisoq siunnersuisinnaavoq.

Alisissumit atuartitsisartoq sumiiffimmilu ilinniartitsisup akunnerminni isumaqatigiissutigissavaat kiap atuartitsineq aallartissaneraa (assersuutigalugu saqqummiinermik). Sorlerluunniit toqqaraluaraanni sumiiffimmi ilinniartitsisoq atuartitsinissap imarisassaanik paasitilluarneqartariaqarpoq, tassami sumiiffimmi ilinniartitsisup klassi aquttussaavaa atuartullu suliaqarneranni atuartunut tapersersuisussaalluni.

Atuartitsinerup nalaani atuartut sumiiffimmi ilinniartitsisumut saaffiginnikkajunnerusarput, sumiiffimmi ilinniartitsisoq aarlaatigut nalornissuteqartilluni siunnersorneqarnissani siunertaralugu alisissumit atuartitsisoq saaffigisinnaavaa.

Atuartitsinerup aallartinnginnerani sumiiffimmi ilinniartitsisup atuartsitsinerup nalaani atortussanik pisariaqartinneqartunik piareersaassaaq aammalu atuartut atuartitsinerup aallartinnginnerani atuartitsinermut peqataanissai anguniarlugit Teams-imut Zoom-imulluunniit isernissaannik ikiussallugit.

Atuartut suliassaat

Pingaaruteqarpoq atuartut alisissumit atuartitsoq ilinniartitsisutut isigissagaat. Arlaatigut atuarfimminni suliaqartillutik atuartut sungiukkuminaatsissinnaavaat sumiiffimmi ilinniartitsunut saaffiginnigatik alisissumit atuartitsisuminnut saaffiginnittarnissartik.
Alisissumit atuartitsinerup nalaani atuartut suleqatigiissinnaapput. Alisissumit atuartitsisup sumiiffimmilu ilinniartitsisup fagimi ilikkagassatut anguniagassat qanoq ilikkartinniassaneraat apeqqutaaginnarpoq.

Aaqqissuussaanermi eqqaamasassat

Kommunit, atuarfinni aqutsisut, alisissumit atuartitsisup sumiiffimmilu ilinniartitsup akornanni ataatsimut alisissumit atuartitsinissamik pilersaarusiornissamut eqqumaffissatut allattukkagut atorsinnaavasi alisissumit atuartitsisoqarnissaanut tunngatillugu oqaluuseerisassat oqaluuserisimanerisi aalajangiiffigisimanerisilu qulakkeerniarlugit:

EQQAAMASASSAT AMMAKKIT

Alisissumik ilinniartitsisup sumiiffinnilu ilinniartitsisut naapinnerini eqqaamasassat

Aaqqissuussaanermi eqqaamasassat

Alisissumit atuartisisartup sumiiffimmilu ilinniartitsisup aalajangersimasumik naapittarnissaat

Alisissumit atuartitsineq pillugu pitsaasumik ingerlaavartumillu oqaloqatigiittarnissaq pingaaruteqarpoq, taamaaliornikkummi atuartitsinissaq suleqatigiinnersilu ineriartortissavarsi.

Ilinniartitsisumit modeli isumassarsiorfiginiarussiuk pingaaruteqarpoq alisissumit atuartitsisartup sumiiffimmilu ilinniartitsisup akornanni aalajangersimasumik ataatsimiittarnissat pilersaarusiornissaat.

Ingerlaavartumik naatsumik ataatsimiittarnissat, alisissumit atuartitsisartup sumiiffimmi ilinniartitsisumik atuartitsinissamut piareersarnerata nalaani naapilaarnissaq siunertaralugu oqaloqatigiinnissaat aammalu sivisunerusumik suleqatigiinneq pillugu sukumiinerusumik oqaloqatigiiffiusinnaasut, pilersaarusiorfiusinnaasut atuartitsinermillu nalilersuiffiusinnaasut ataatsimiissutigineqartariaqarput. Assersuutigalugu qaammammut ataasiarluni marloriarluniluunniit ataatsimiittarnissat aallartisarnermi ullorsiutinut ikkunneqareersinnaapput.

Kalaallit Nunaata Kujataani alisissumit atuartitsisartoq, Lillian Møller, nammineerluni eqqumaffissaminik suliaqarsimavoq, taannalu atorlugu alisissumit ilinniartitsisimaneq Lillian Møllerip sumiiffimmilu ilinniartitsup nalilersortarpaat. Lilliani sumiiffimmilu ilinniartitsisoq qaammammut marloriarlutik ataatsimiittarput, eqqumaffissallu nalunaarsuiffimmut allattorneqarsimasut tamakkerlugit oqaluuserisarpaat.

Atuarfimmi ataatsimi alisissumit atuartitsisartut arlallit

Alisissumit atuartisisartoq nunaqarfimmiittunik atuartitsitsisussaatillugu, takunikuusagut naapertorlugit, iluaqutaasinnaavoq alisissumit atuartitsisartoq alisissumit atuartitsinissaminut alisissumit atuartitsisartumik suleqatiminik oqaloqateqarsinnaanissaa. Kommunit alisissumit nunaqarfimmi modeli Ilinniartitsisumilluunniit modeli atorlugu atuartitsisalerusuttut eqqarsaatigissavaat arlalinnik suleqatigiinnik alisissumit atuartitsisinnaasoqarnissaq. Tamaaliornikkut alisissumit atuartitsisussat ingerlaavartumik atuartitsineq pillugu oqaloqatissaqassapput ataatsimoorlutillu alisissumit atuartisinissaminnik ineriartortitsisinnallutik.

Atuarfiit assigiinngitsut marluk akornanni aaqqissuussineq pilersaarusiornerlu

Ilinniartitsisumit modeli Nunaqarfimmi modelimut sanilliunneqarsinnaavallaanngilaq, tassami skemat assigiimmik inissinneqartariaqanngillat, tassami sumiiffimmi atuartitsisoq atuartitsinermik ingerlatsisuusussaavoq. Taamaakkaluartoq isumassarsiatsialaassaaq atuarfiit taakku marluk – alisissumit atuartitsisartup suliffia nunaqarfimmilu atuarfik – ataatsimoorlutik pilersaarusioqatigiinnissaat eqqarsaatigissagaallu sukkut qanoq ataqatigiinnissamik pisariaqartitsinerlutik. Aammattaaq eqqarsaatigineqassaaq kina skemamik aaqqissuinissamut akisussaasuussanersoq.

Atuarfimmi aqutsisunik ingerlaavartumik oqaloqatiginnittarneq nalilersuisarnerlu

Alisissumit atuartitsisartup alisissumit atuartitsinissaminut pitsaanerpaanik sinaakkuteqarnissaanut atuarfimmi suliffigisaani aqutsisut pingaarutilittut inissisimapput. Alisissumit atuartitsisartunut amerlanerpaanut alisissumit atuartitsineq nutaajuvoq, taamaattumik pingaaruteqarpoq sulinerminni ’kisimiittutut’ misiginnginnissaat. Taamaattumik innersuussutigaarput atuarfinni aqutsisut ingerlaavartumik oqaloqatiginnittarnissaat aammalu alisissumit atuartitsisumik oqaloqatiginnillutillu naliliisarnissaat.

Atuartitseriaatsimik teknologiimillu eqqarsaatersuuteqarneq

Alisissumit atuartitsisussap atuartitsinissaminut pilersaarusiatsialaa

Alisissumit atuartitsiniarnermi pingaarutilittut eqqarsaatigisassaq tassaavoq klassimik atuartisiniarnermi qanoq alisissumit atuartitseriaaseqartoqassanersoq.

Ilinniartitsisumit modelimi alisissumit atuartitsisoq atuartullu akornanni iluamik oqaloqatigiittoqarneq ajorpoq, tassami atuartitsineq amerlanertigut sumiiffimmi ilinniartitsisumit ingerlanneqartarmat. Tamaattumik internetimut attaveqarnissaq pisariaqartinneqannginnerusarpoq, taamaakkaluartoq soorunami alisissumit atuartitsisoq atuartitsinissinni qanoq peqataatinneqartigissanersoq eqqarsaatigineqartariaqarpoq.

Nunaqarfinni internetimut attaviluttuni piffissalluunniit ilaani attaviluttartuni Ilinniartitsisumit modeli atussallugu ajussanngilaq.

Taamaakkaluartoq alisissumit atuartitseriaaserisassassinni eqqarsaatigisariaqarpasi:

Atuartut nittartakkakkullu atuartitsisup inissisimaffigisinnaasaannik nassaaritsi. Tassa imaappoq atuartut inissaqassapput aammalu alisissumit atuartitsissussaq inissaqassaaq. Eqqarsaatigisiuk:

Nipituallaannginnissaa
Taarpallaannginnissaa aammalu assiliivik eqqarsaatigalugu igalaamit qaamanermik annertuallaamik saqqaqqasoqannginnissaa.
Init atuartitsiffiusussat alisissumit atuartitsinissamut atortunik imaqarsinnaapput.Alisissumit atuartitsisussap inigisaani flipovereqarsinnaavoq imaluunniit tavlinnguaqarsinnaavoq/whiteboardinnguaqarsinnaavoq. Imaassinnaavoq aamma atortorisanut assiliiveqartoqassasoq titartakkat allatallu allalluunniit takutinniakkat takutinneqarsinnaaniassammata, taamaaliornerullu nalaani suli kiinaq takuneqarsinnaassalluni.

Atuartut atuarfigisassaannut eqqarsaatigisassat:

Atuartut immikkut iPad-ilerlutik malinnaassappat? Ataatsimoorlutik skærmersuakkut malinnaassappat? Imaluunniit akulerussuunneqassappat?
Alisissumit atuartitsisup klassi tamakkerlugu atuartullu takusinnaaniassammagit sumiiffimmi ilinniartitsisoq iPad-imik stativilerluguluunniit inissiissava?
Atuartitsineq pitsaanerpaamik ingerlanniarlugu atuartut qanoq inissisimatinneqassappat?
Nipip pitsaasup atorneqarnissaa qanoq qulakkeerneqassava?
Atuartut atuartitsinerup nalaani siutequteqassappat?
Qanoq sammisaqartoqassanersoq apeqqutaalluni init assigiinngitsut atorneqartarsinnaappat?

Alisissumit atuartitsisussap inissaanut eqqarsaatigisassat:

Alisissumit atuartitsisussaq tavlip saavani issiassava/nikorfassava? Imaluunniit iPad tavletut atorneqassava (soorlu keynote immaqaluunniit PowerPoint)?
Alisissumit atuartitsisoq atuartitsinerup nalaani siutequteqassava?
Alisissumit atuartitsisoq atuartut inaannit atuartunillu ataasiakkaanit nipimik pitsaasumik pissarsinissaa qanoq qulakkeerneqassava?

Atuartut tatiginninnerat toqqissisimanissaallu

Atuartut arlallit alisissumit atuartitsineq nuannaraat. Qanoq pissuseqarnissaminnik ilikkapallattarput kiisalu alisissumit atuartitsinneqarnissaminnik ilinniartitsisumullu toqqissisimalipallattarput. Atuartut sungiunniartussaavaat alisissumit atuartitsisumut attaveqarniarneq allaanerummat, taamaattumik atuartut toqqissisimalernissaat anguniarlugu piffissamik atuinissaq pingaaruteqarpoq. Eqqarsaatigisiuk:

Alisissumit atuartunut qanoq pitsaasumik attaveqartoqarsinnaava?
Atuartut alisissumit atuartitsinneqarnissaminnut tatiginnilernissaat toqqissisimalernissaallu anguniarlugu qanoq iliuuseqartoqarsinnaava?

Nunaqarfimmut pulaarneq

Alisissumit atuartitsisup atuartut atuartittagassani tikeraartariaqanngilai. Tamaakkaluartoq alisissumit atuartitsinerup aallartinnerani ilinniartitsisup atuartut ilisarisimalernissai anguniarlugit iPad-iinut ataasiakkaarluni sianersinnaavoq paasiniarlugu qanoq suleriuseqarnersut, qanoq suliaqartarnersut aammalu malinnaaffiginiarlugit.

Piffissaqartoqassappat alisissumit atuartitsisartoq atuarfimmut alakkaasinnaavoq. Tikeraalaarneq atuartunut pitsaasumik kinguneqarsinnaavoq, tassami alisissumit atuartitsisuminnik qanimut ataatsimiititsissagamik. Alisissumit atuartitsisup alakkaanermini atuartut inuttut, inuiaqatigiittut fagimilu inissisimaffii paasisaqarfigisinnaavai.

Alisissumit atuartitsisumut atuarfimmut alakkaaneq aamma iluaqutaasinnaavoq allatut, tassami kikkut suleqatiginerlugit, suni atuartitsisarnersut, sunik pikkoriffeqarnersut paasisinnaassagamigit, qaqugukkullu kikkut qanoq ikiortiserisinnaanerlugit paasissallugu.

Alisissumit atuartitsisumut atuarfimmi sumiiffimmilu suut periarfissaanersut ilisimasaqarfigissallugu iluaqutaasinnaavoq. Tamaalilluni atuartut ulluinnarni avatangiisii alisissumit atuartitsinermi ilanngunneqarsinnaassallutik.

Atuartunik alakkaaneq alisissumit atuartitsinermut ilanngunneqarsinnaavoq. Piffissap ilaani alisissumit atuartitsinerup ingerlanneqarnerani alisissumit atuartitsisup atuarfimmut alakkaanerani sunik alakkaassanersoq atuartunit pilersaarusiorneqarsinnaavoq.

Imaluunniit killormut: Tikeraarnerup nalaani atuartut alisissumit atuartitsisartoq peqatigalugu arlaannik katersisinnaapput, iPad-ikkut immiussisinnaapput, arlaannik sanallutik aallartisarsinnaapput, misileraanermik aallartitsisinnaapput, taakkualu alisissumit atuartitsisartoq sumiiffimminut utereerpat nangeqqinneqarsinnaallutik.

Suleqatigiinneq, oqaloqatigiinneq aalanerlu

Ulluinnarni klassimi atuartitsinermisulli allanngorartitsinissaq pingaaruteqarpoq. Misilittakkat takutippaat alisissumit atuartitsineq maannamut ilinniartitsisumit- atuartumut ataatsimut atuartitsinermut qaninnerusoq, tamaattumik atuartitseriaaseq issiaannarluni ingerlanneqakkajuppoq. Tamaattumik eqqarsaatigiuk:

Atuartitsinissamik pilersaarusiorninni qanoq iliorlutit atuartut akornanni suleqatigiinneq oqaloqatigiinnerlu pilersissinnaanerlugu.
Atuartut piffissami annerpaami issiaannannginnissaat anguniarlugu atuartitsinermi qanoq aalatitsisoqarsinnaava?

Ataani takuneqarsinnaavoq pinngortitalerinermi alisissumit atuartitsinermi atuartut ilaatigut equutinik eqqusannillu ujarlertinneqarsimasut.

Atuartut ulluinnarni inuunerat atuartisinermut ilanngunneqarnissaa

Ilinniartitsisumit modeli atorussiuk, sumiiffimmi ilinniartitsisoq atuartitsinermik ingerlatsissaaq taannalu sumiiffimmi pissutsinik atuartitsinermut akulerussinissaminut periarfissaqarluassaaq. Atuartut nunaqarfimmi inuunerat atuartinneqarnerminnut ilanngunneqartillugu, atuartunut atuartitsineq qaninnerulertarpoq, namminneerlutillu misilittakkatik ulluinnatilllu atuartinneqarnerminni atorsinnaalissallugit. Atuartitsinissassinnik piareersarnissinni eqqarsaatigisigit:

Atuartitsinerni assigiinngitsuni atuartut namminneerlutik misilittagaat ulluinnarsiutaallu qanoq ilanngunneqarsinnaappat?
Nunaqarfimmi avatangiiserineqartut atuartitsinermut qanoq ilanngunneqarsinnaappat?

Ataani Kujataani alisissumit atuartitsisartup, Lillian Møllerip, Aappilattuni atuartut tuluttoortittagai qanoq auartinneqarsimanersut takuneqarsinnaapput. Atuartut nunaqarfimminni assiliissapput filmiliorlutilluunniit, assilisimasatillu aallaavigalugit nunaqarfitsik tuluttut saqqummiutissallugu.

Atortut tigussaasut digitaliusullu atorneqassapput

Naak atuartitsineq alisissumit ingerlagaluartoq atortussiat tigussaasut assigiinngitsorpassuit atorneqarsinnaapput. Alisissumit atuartitsinermi ilaatigut nammineq pilersitat saqqummersitsisarfinnilluunniit saqqummersitat atorlugit atuartitsineq takuarput.

Qanoq iliorniarnerluni uani eqqarsaatigisiuk. Assersuutigalugu:

Nammineq atortussianik atuineq
Najuulluni atuartitsinermi atorneqartartunik suliareersunik alisissumit atuartitsinermi atuineq
Alisissumit atuartitsisup paasisaanik atuineq
Atuartut tigusinnaasaannik atuineq
Atuartut namminneerlutik (imaluunniit sumiiffimmi ilinniartitsisup) atortussianik suliaqassappat/anisitsissappat/nassiussissappat?

Alisissumit atuartitsisartoq sumiiffimmilu ilinniartitsisoq suleqatigiillutik atuartitsinissamik pilersaarusiussapput atortussianillu toqqaassallutik.

Aappilattumi atuartut pap-i atorlugu suliaqartut.

Tuluttut atuartitsinermi ”Family” sammineqartoq.

iPad sakkussatut

Pitsaanerpaassaaq atuartut iPad-imik angerlaassisarnissaannik atuarfiliaassisarnissaannillu sungiusaraanni. Taamaasiornikkut alisissumit atuartitsisisoq atuartitsinissaminut amerlanerusunik periarfissaqassaaq. Iluaqutaasinnaavortaaq atuartoq angerlarsimaffimmini internetimut attaveqaruni, periarfissaqassaguni atuartoq atuarnerup avataani suliassanik tigusisinnaallunilu tunniussisinnaalluni. Atuartut angerlarsimaffimminni interneteqarunik, ataatsimoorlutik ilinniakkereqatigiissinnaapput imaluunniit alisissumit ilinniartisisorisaminnik angerlarsimaffimminni ilitsersuunneqarsinnaapput.

Internetimut attavilunnermi allamik pilersaaruteqarsinnaaneq

Sumiiffiit ilaanni internetimut attaveqarniarneq ajornakusoorsinnaasarpoq. Tamanna eqqarsaatigalugu isuamassarsiatsialaavoq allamik pilersaaruteqarsinnaaneq. Tamannalu sumiiffimmi ilinniartitsisup nittartakkakkullu atuartitsisartup akornanni isumaqatigiissusiorfigineqassaaq. Ukua oqaluuserisinnaavasi:

- Internetimut attaveqanngikkutta qanoq iliorsinnaavugut?
- Qanoq iliussaagut taamaattoqarpat? Immitsinnut sianerfigaluta ataqatigiissaarissaagut?
- Sumiiffimmi ilinniartitsisup alisissumit atuartitsisumit ilitsersorneqarnikkut ikiorneqarnikkullu atuartisineq ingerlatissavaa?

Internetimut attavilunnermi allamik pilersaaruteqarsinnaaneq

Internetimut attaveqanngikkutta qanoq iliorsinnaavugut?
Qanoq iliussaagut taamaattoqarpat? Immitsinnut sianerfigaluta ataqatigiissaarissaagut?
Sumiiffimmi ilinniartitsisup alisissumit atuartitsisumit ilitsersorneqarnikkut ikiorneqarnikkullu atuartisineq ingerlatissavaa?

Aasiannut Kitsissuarnullu alakkaaneq

Filmimi ataanut ikkunneqarsimasumi takuneqarsinnaavoq alisissumit atuartitsisartoq, Martha Nielsen, Aasianni atuarfimmit Kitsissuarsunni nunaqarfimmi atuarfimmut alisissumit atuartitsisoq.

Nunaqarfinni modeli

Suleqatigiinni modeli