Nunaqarfinni modeli
Nunaqarfini modelip ilisarnaatai suuppat suullu iluaqutitarai?
Nunaqarfini modelip ilisarnaatai suuppat suullu iluaqutitarai?
Nunaqarfimmi modelimi alisissumit ilinniartitsisoq atuarfimmi allami ilinniartitsisutut ’nalinginnaasutut’ atorfeqarpoq, nittartakkakkullu atuartittagai atuarfimmi allami atuarfeqarlutik. Ilinniartitsisup atorfeqarnerminut atatillugu atuartut nunaqarfimmi illoqarfimmiluunniit allami atuarfimmi atuartut alisissumit atuartittarpai.
Alisissumit atuartitsisup alisissumit atuartitsisarnermi saniatigut nalinginnaasumik atuarfimmi atorteqarfigisamini atuartitsisarpoq.
Alisissumit atuartitsisartoq nammineerluni aqutsisoqarlunilu allaffimmioqarpoq, taakkualu alisissumit atuartittakkami atuarfiani inissisimanngillat.
Atuartut atuarfianni aqutsisoq nittartakkakkullu atuartitsisartup atuarfia iluminni isumaqatigiissutigisarpai, alisissumit fagit piffissallu sorliit atuartitsissutigineqartassanersut. Modelimi pineqartumialisissumit atuartitsisartoq atuartut atuarfianni aqutsisunut, ilinniartitsisunut timelærerinullu ikiuussinnaallunilu siunnersuisinnaavoq.
Nunaqarfimmi modelip iluaqutai ilaatigut tassaapput:
-
- Inuiaqatigiit ikittut avataanit nukissanik tunineqarsinnaapput, taamaalilluni fagimut, inuiaqatigiinnut ilorrisimaarsinnaanermullu nukissanik tunisisarluni.
- Atuartut illoqarfimmi atuartinneqartarnissaminnut ikaarsaarfittut atorsinnaavaat. Nunaqarfinni atuartut nuunnginnerminni atuaqatissatik ilinniartitsisussatillu ilinniarsinnaavaat. Nunaqarfinni atuartut atuartut amerlanerit akornanni atuarnissaminnut aammalu fagitigut piumasaqaataasunut sungiusarneqarsinnaapput.
Suleqatigiinnissamut aaqqissuussinissamullu eqqarsaatersuutit
Atuartitsinnginnermi, atuartitsinermi atuartitsinerullu kingorna suliassat
Alisissumit atuartitsinermik aallartitsigussi, pingaaruteqarpoq alisissumit atuartitsisussap aammalu atuartut atuarfianni sumiiffimmi ilinniartitsisup suliassai suunersut inissereerussigit.
Eqqarsaatigisiuk:
- Atuartitsinnginnermi, atuartitsinermi atuartitsinerullu kingorna alisissumit atuartitsisussap aammalu sumiiffimmi ilinniartitsisup suut suliassarai?
- Alisissumit atuartitsisartoq atuartunut qanoq attaveqassava? Sumiiffimmi ilinniartitsisoq atuartitsisoqarnerata nalaani atuartunut qanoq attaveqartassava?
- Sumiiffimmi ilinniartitsisoq atuartitsisoqannginnerani qanoq piareersaasassava?
- Qanoq qaqugukkullu alisissumitatuartitsisartup sumiiffimmi ilinniartitsisoq atuartitsisoqarnissaanut piareersartassavaa ataqatigiissaareqatigisassallugulu (assersuutigalugu atortussanik assigisaannillu piareersaanissaq)?
Atuarfinni pineqartuni marlunni aqutsisut qulaani taakkartorneqartut suliassaannik inissiinissaq, aammalu immikkoortut sisamat aallaqqaammut taaneqartut iluanni sinaakkusiinissaq, allaaserisap saqqani takuneqarsinnaavoq.
Pingaaruteqarportaaq alisissumit atuartitsisup sumiiffimmilu ilinniartitsisup pilersaarusioqatigiittarnissaat, taamaaliornikkut illuatungeriit pilersaarutit misilittakkallu pillugit paaseqatigiittassapput.
Imaassinnaavoq piffissap ingerlanerani aqutsisoq atuartitsisartulluunniit arlaatigut nalimmassaasut? Aqutsisut tamanna eqqumaffigisariaqarpaat immaqalu aalajangersimasumik ataatsimiittoqartarnissaanut naliliinissamulluunniit oqaloqatigiinnissamut iliuuseqartariaqartassallutik.
Immissinnut paaseqatigiittarussi atuartitsisoqarnerani kikkut qanoq suliaqassanersut aammalu suleqatigiinnerup iluani arlaatigut nalorninartorsiorfiusinnaasut ingalassimaartissinnaavasi.
- Alisissumit atuartitsisartup akisussaaffigisussaavaa nunaqarfinni atuartunut atuartitsinissap pilersaarusiornissaa ingerlannissaalu, aammalu atuartitsisoqarnerani peqataanissaq.
- Alisissumitatuartsitsisartup akisussaaffigissavaa atuartut killiffiinik nalilersuinissaq – tamanna anguneqassaaq atuartut atuarfianni ilinniartitsisumik oqaloqateqarnikkut.
- Atuartitsisoqarnerata nalaani alisissumit atuartitsisup pingaarnertut atuartunut attaveqartuullunilu oqaloqatiginnittuussaaq.
- Atuartitsinermi atuartut ataatsimut ataasiakkaarlugilluunniit atuartinneqarsinnaapput immaqaluunniit ataatsimut ataasiakkaarluniluunniit sammisaqartitsinerit ingerlanneqassallutik.
Tassa imaappoq, alisissumit atuartitsisoq nalinginnaasumik fagimi pineqartumi nalinginnaasumik atuartitsisoqassagaluarpat tunngaviusumik atuartitsisussatut inissisimassasoq.
Naak alisissumit atuartitsisisoq atuartitsinermik aaqqissuussillunilu ingerlatsisuugaluartoq, atuartut nunaqarfimmi pingaarnertut attaveqaatigisaat ilinniartitsisoq, pingaarutilimmik inissisimavoq:
- Sumiiffimmi ilinniartitsisup atuartitsisoqarnerata nalaani unikkallatsiarnernilu atuartut kaammattussavai kajumissarlugillu.
- Eqqarsaatigineqarsinnaavoq assersuutigalugu atuartut nammineernerullutik suliassaqartillugit sumiiffimmi ilinniartisisup klassip iluani atuartut akornanni ingerlaartarsinnaanissaa, pisariaqartitsisunik ikiuunnissaa, suliassalli alisissumit atuartitsisartoq peqatigalugu ingerlanneqarsinnaapput.
- Atuartitsineq sioqqullugu sumiiffimmi ilinniartitsisup atuartitsiffissaq atortussallu piareersassavai kiisalu atuartut atuartitsisoqarnissaanut piareersimaqqullugit atortunut teknologiinullu piareersartassallugit. Pingaaruteqarpoq sinaakkutinut tunngatillugu atuarfimmi aqutsisut tapersersuinissaat, arlaatigullu pisariaqartitsisoqartillugu oqarfigineqartarnissaat.
- Sumiiffimmittaaq atuartitsisup suliassaraa atuartitsiffissap pilersinneqarnissaa. Uani pineqarpoq atuartunut allatut isumaqatigiittoqarsimatinnagu alisissumit atuartitsisoq pingaarnertut atuartitsisoqarnerani inissisimanera pillugu ersarissumik paasititsinissaq.
- Pingaaruteqarpoq atuartut alisissumit atuartitsoq ilinniartitsisutut isigissagaat. Arlaatigut atuarfimminni suliaqartillutik atuartut sungiukkuminaatsissinnaavaat sumiiffimmi ilinniartitsunut saaffiginnigatik alisissumit atuartitsisuminnut saaffiginnittarnissartik.
- Alisissumit atuartitsinerup nalaani atuartut suleqatigiissinnaapput. Alisissumitatuartitsisup sumiiffimmilu ilinniartitsisup fagimi ilikkagassatut anguniagassat qanoq ilikkartinniassaneraat apeqqutaaginnarpoq.
Kommunit, atuarfinni aqutsisut, alisissumit atuartitsisup sumiiffimmilu ilinniartitsup akornanni ataatsimut alisissumit atuartitsinissamik pilersaarusiornissamut eqqumaffissatut allattukkagut atorsinnaavasi alisissumit atuartitsisoqarnissaanut tunngatillugu oqaluuseerisassat oqaluuserisimanerisi aalajangiiffigisimanerisilu qulakkeerniarlugit:
Misillittakkat (suliassanik agguaanertalik)
Nittartakkakkut atuartitsisartup suliassai
Sumiiffimmi ilinniartitsisup suliassai
Alisissumit atuartitsisartoq sumiiffimmilu ilinniartitsisoq aalajangersimasumik ataatsimiittarnissaat
Pingaaruteqarpoq alisissumit atuartisineq pillugu angusaqarfiulluartumik ingerlaavartumillu oqaloqatigiittarnissarsi, taamaaliornikkut atuartitsineq suleqatigiinnersilu ineriartortissavarsi.
Uani isumassarsiatsialaasinnaavoq alisissumit atuartitsisartup sumiiffimmilu ilinniartitsisup aalajangersimasumik ataatsimiittarnissaannik pilersaarusiornissaq. Assersuutigalugu ukioq atuartitsiffissaq aallartiinnartoq qaammamut ataasiarlusi marloriarlusiluunniit ataatsimiittarnissasi ullorsiutissinnut ikkussinnaavasi. Aalajangersimasumik ataatsimiittarnerit aqqutigalugit atuartitsineq pillugu oqaloqatigiinnissaq, pilersaarusiornissaq naliliinissarlu ingerlanneqarsinnaapput.
Kalaallit Nunaata Kujataani alisissumit atuartitsisartoq, Lillian Møller, nammineerluni eqqumaffissaminik suliaqarsimavoq, taannalu atorlugu alisissumit ilinniartitsisimaneq Lillian Møllerip sumiiffimmilu ilinniartitsup nalilersortarpaat. Lilliani sumiiffimmilu ilinniartitsisoq qaammammut marloriarlutik ataatsimiittarput, eqqumaffissallu nalunaarsuiffimmut allattorneqarsimasut tamakkerlugit oqaluuserisarpaat.
Immaqa alisissumit atuartitsisimanissi nalilersornissaanut nalunaarsuiffimmi allassimasut isumassarsiorfigisinnaaruttorisi?
Atuarfimmi ataatsimi alisissumit atuartitsisartut arlallit
Alisissumit atuartitsisartut nunaqarfimmiunik atuartitsisartillugit, paasinikuuarput alisissumit atuartitsisartut alisissumit atuartitsineq pillugu isumasioqatissaminnik alisissumit atuartitsisartumik suleqateqarnissartik iluarigaat. Kommunimi Nunaqarfimmi modeli Ilinniartitsisumit modelimillu atuillutik alisissumit atuartisinissamik arlalinnik atuartitsisoqarnissamik eqqarsaatersorsimagunik, immaqa eqqarsaatigineqarsinnaavoq atuartitsisussat arlaatigut ataatsimoortinnissaat isumassarsiatsialaassanersoq. Taamaaliortoqarneratigummi alisissumit atuartitsisartut ingerlaavartumik atuartisineq pillugu oqaloqatigiittarsinnaapput ataatsimoorlutillu atuartitseriaatsiminnik ineriartortitsisinnaallutik.
Atuarfiit marluk akornanni aaqqissuussineq pilersaarusiornerlu
Pingaaruteqartorujussuuvoq atuarfiit pineqartut marluk – alisissumit atuartitsisup suliffia aammalu atuartut atuarfiat – ataatsimut ukioq naallugu skemalioqatigiinnissaat pilersaarusioqatigiinnissaallu, taamaasillutik atuarfiit marluullutik ingiaqatigiissinnaassapput. Tulliuttumi allassimasut eqqarsaatigisigit:
- Skemaliornissaq kiap akisusaaffigissavaa?
- Atuarfinni marluusuni qanoq innikkut allanik sammisaqartassappat? Ajornartorsiutinik nalaassisoqannginnissaa anguniarlugu qanoq ataqatigiissaarisoqartassava?
- Qanoq innikkut anitsiartoqarlunilu isaasoqartassava? (Piffissat qanoq eqqorluartigineqartassappat?)?
- Qanoq innikkut allanik sammisaqartoqartassava? Allanik sammisaqartitsisoqarnerani alisissumit atuartitsisartoq peqataassassava imaluunniit unikkallartassava?
Atuarfimmi aqutsisunik ingerlaavartumik oqaloqatiginninnissaq nalilersuinissarlu
Alisissumit atuartitsisartup alisissumit atuartitsinissaminut pitsaanerpaanik sinaakkuteqarnissaanut atuarfimmi suliffigisaani aqutsisut pingaarutilittut inissisimapput. Alisissumit atuartitsisartunut amerlanerpaanut alisissumit atuartitsineq nutaajuvoq, taamaattumik pingaaruteqarpoq sulinerminni ’kisimiittutut’ misiginnginnissaat. Taamaattumik innersuussutigaarput atuarfinni aqutsisut ingerlaavartumik oqaloqatiginnittarnissaat aammalu alisissumit atuartitsisumik oqaloqatiginnillutillu naliliisarnissaat.
Atuartitseriaasissamut teknologimullu tunngatillugu eqqarsaatigisariaqakkat
Alisissumit atuartitsisartut klassimi pilersaarusiorluarnissaa
Klassimik alisissumit atuartitsinissamut nittartakkakkullu atuartitsisussap isersimaffigisassaata aaqqissuulluarneqarsimanissaata eqqarsaatiginissaa pingaaruteqarpoq. Pitsaanerpaamik periuseqalernissassinnut imaassinnaavoq periuutsinik assigiinngitsumik misileraaqqaartariaqartusi. Eqqarsaatigineqarsinnaasut:
Atuartut nittartakkakkullu atuartitsisup inissisimaffigisinnaasaannik nassaaritsi. Tassa imaappoq atuartut inissaqassapput aammalu alisissumit atuartitsissussaq inissaqassaaq.
Eqqarsaatigisiuk:
- Nipituallaannginnissaa.
- Taarpallaannginnissaa aammalu assiliivik eqqarsaatigalugu igalaamit qaamanermik annertuallaamik saqqaqqasoqannginnissaa.
- Init atuartitsiffiusussat alisissumit atuartitsinissamut atortunik imaqarsinnaapput. Alisissumit atuartitsisussap inigisaani flipovereqarsinnaavoq imaluunniit tavlinnguaqarsinnaavoq/whiteboardinnguaqarsinnaavoq. Imaassinnaavoq aamma atortorisanut assiliiveqartoqassasoq titartakkat allatallu allalluunniit takutinniakkat takutinneqarsinnaaniassammata, taamaaliornerullu nalaani suli kiinaq takuneqarsinnaassalluni.
- Atuartut immikkut iPad-ilerlutik malinnaassappat? Ataatsimoorlutik skærmersuakkut malinnaassappat? Imaluunniit akulerussuunneqassappat?
- Alisissumit atuartitsisup klassi tamakkerlugu atuartullu takusinnaaniassammagit sumiiffimmi ilinniartitsisoq iPad-imik stativilerluguluunniit inissiissava?
- Atuartitsineq pitsaanerpaamik ingerlanniarlugu atuartut qanoq inissisimatinneqassappat?
- Nipip pitsaasup atorneqarnissaa qanoq qulakkeerneqassava?
- Atuartut atuartitsinerup nalaani siutequteqassappat?
- Qanoq sammisaqartoqassanersoq apeqqutaalluni init assigiinngitsut atorneqartarsinnaappat?
- Alisissumit atuartitsisussaq tavlip saavani issiassava/nikorfassava? Imaluunniit iPad tavletut atorneqassava (soorlu keynote immaqaluunniit PowerPoint)?
- Alisissumit atuartitsisoq atuartitsinerup nalaani siutequteqassava?
- Alisissumit atuartitsisoq atuartut inaannit atuartunillu ataasiakkaanit nipimik pitsaasumik pissarsinissaa qanoq qulakkeerneqassava?
Atuartut tatiginninnissaat toqqisisimanissaallu
Atuartut arlallit alisissumit atuartitsineq nuannaraat. Qanoq pissuseqarnissaminnik ilikkapallattarput kiisalu alisissumit atuartitsinneqarnissaminnik ilinniartitsisumullu toqqissisimalipallattarput. Atuartut sungiunniartussaavaat alisissumit atuartitsisumut attaveqarniarneq allaanerummat, taamaattumik atuartut toqqissisimalernissaat anguniarlugu piffissamik atuinissaq pingaaruteqarpoq. Eqqarsaatigisiuk:
Atuartut arlallit alisissumit atuartitsineq nuannaraat. Qanoq pissuseqarnissaminnik ilikkapallattarput kiisalu alisissumit atuartitsinneqarnissaminnik ilinniartitsisumullu toqqissisimalipallattarput. Atuartut sungiunniartussaavaat alisissumit atuartitsisumut attaveqarniarneq allaanerummat, taamaattumik atuartut toqqissisimalernissaat anguniarlugu piffissamik atuinissaq pingaaruteqarpoq. Eqqarsaatigisiuk:
- Alisissumit atuartunut qanoq pitsaasumik attaveqartoqarsinnaava?
- Atuartut alisissumit atuartitsinneqarnissaminnut tatiginnilernissaat toqqissisimalernissaallu anguniarlugu qanoq iliuuseqartoqarsinnaava?
Alisissumit atuartitsisup atuartut atuartittagassani tikeraartariaqanngilai. Tamaakkaluartoq alisissumit atuartitsinerup aallartinnerani ilinniartitsisup atuartut ilisarisimalernissai anguniarlugit iPad-iinut ataasiakkaarluni sianersinnaavoq paasiniarlugu qanoq suleriuseqarnersut, qanoq suliaqartarnersut aammalu malinnaaffiginiarlugit.
Piffissaqartoqassappat alisissumit atuartitsisartoq atuarfimmut alakkaasinnaavoq. Tikeraalaarneq atuartunut pitsaasumik kinguneqarsinnaavoq, tassami alisissumit atuartitsisuminnik qanimut ataatsimiititsissagamik. Alisissumit atuartitsisup alakkaanermini atuartut inuttut, inuiaqatigiittut fagimilu inissisimaffii paasisaqarfigisinnaavai.
Alisissumit atuartitsisumut atuarfimmut alakkaaneq aamma iluaqutaasinnaavoq allatut, tassami kikkut suleqatiginerlugit, suni atuartitsisarnersut, sunik pikkoriffeqarnersut paasisinnaassagamigit, qaqugukkullu kikkut qanoq ikiortiserisinnaanerlugit paasissallugu.
Alisissumit atuartitsisumut atuarfimmi sumiiffimmilu suut periarfissaanersut ilisimasaqarfigissallugu iluaqutaasinnaavoq. Tamaalilluni atuartut ulluinnarni avatangiisii alisissumitatuartitsinermi ilanngunneqarsinnaassallutik.
Atuartunik alakkaaneq alisissumit atuartitsinermut ilanngunneqarsinnaavoq. Piffissap ilaani alisissumit atuartitsinerup ingerlanneqarnerani alisissumit atuartitsisup atuarfimmut alakkaanerani sunik alakkaassanersoq atuartunit pilersaarusiorneqarsinnaavoq.
Imaluunniit killormut: Tikeraarnerup nalaani atuartut alisissumit atuartitsisartoq peqatigalugu arlaannik katersisinnaapput, iPad-ikkut immiussisinnaapput, arlaannik sanallutik aallartisarsinnaapput, misileraanermik aallartitsisinnaapput, taakkualu alisissumit atuartitsisartoq sumiiffimminut utereerpat nangeqqinneqarsinnaallutik.
Nalinginnaasumik atuartitsinertulli alisissumit atuartitsinermi allanngorartitsinissaq pingaaruteqarpoq.
Aallaqqaataaniilli atuartunut ataasiakkaanut pingaaruteqarsinnaavoq ilisimassallugu sooq alisissumitatuartitsisartumut attaveqarnissaq ilisimasaqarnissarlu pingaaruteqarsinnaasoq – tassunga aamma peqqutaaqataasinnaavoq nunaqarfimmi atuaqatigiit akornanni ukiut assigiinngisinnaammata – atuartitseriaaseqarnissamut aamma tamanna attuumassuteqarsinnaavoq. Eqqarsaatigisiuk:
- Atuartitsinerup nalaani atuartut akornanni suleqatigiinnissaq attaveqarnissarlu qanoq pilersinneqarsinnaava?
- Atuartitsinerup nalaani atuartut piffissaq tamakkerlugu issiaannannginnissaat anguniarlugu qanoq aalartitsisoqarsinnaava?
- Sumiiffimmi avatangiisit atuartitsinermut qanoq ilanngunneqarsinnaappat
- Alisissumit atuartitsisoq sumiiffimmilu ilinniartitsisoq ilinniartitsisoritillugit atuartut akornanni qanoq ilinniaqatigiittoqarsinnaava?
Atuartitseriaatsimi isumatusaarnerussaaq atuartitsinermi atuartut ulluinnaanik ilanngussinissaq. Taamaalilluni atuartitsineq atuartunut qaninnerulissaaq, taamaalillutik aamma misilittakkaminnik ulluinnarminnillu oqaloqatigiissuteqarsinnaalissapput. Atuartitsinissamik pilersaarusiornissinni eqqaamassavasi:
- Atuartitsinerni assigiinngitsuni atuartut misilittagaat ulluinnaallu qanoq ilanngunneqarsinnaappat?
- Nunaqarfimmi avatangiisit atuartitsinermut qanoq ilanngunneqarsinnaappat?
- Atuartut atuarfinnit assigiinngitsuneerst suliassanut suleqatigiissinnaappat immaqaluunniit imminnut atuartissinnaappat?
Naak atuartitsineq alisissumit ingerlagaluartoq atortussiat tigussaasut assigiinngitsorpassuit atorneqarsinnaapput. Alisissumit atuartitsinermi ilaatigut nammineq pilersitat saqqummersitsisarfinnilluunniit saqqummersitat atorlugit atuartitsineq takuarput.
Qanoq iliorniarnerluni uani eqqarsaatigisiuk. Assersuutigalugu:
- Nammineq atortussianik atuineq
- Najuulluni atuartitsinermi atorneqartartunik suliareersunik alisissumit atuartitsinermi atuineq
- Alisissumit atuartitsisup paasisaanik atuineq
- Atuartut tigusinnaasaannik atuineq
- Atuartut namminneerlutik (imaluunniit sumiiffimmi ilinniartitsisup) atortussianik suliaqassappat/anisitsissappat/nassiussissappat?
Alisissumit atuartitsisartoq sumiiffimmilu ilinniartitsisoq suleqatigiillutik atuartitsinissamik pilersaarusiussapput atortussianillu toqqaassallutik.
Kivitsisa alisissumit atuartitsinermi iPad pingaarnertut atortussatut isigineqarpoq. Ataatsimulli isiginninnermi tabletsit allat qarasaasiallu aamma atorneqarsinnaapput. Misilittakkat takutippaat pingaaruteqartoq atuartunut ataasiakkaanut atortoqarnissaq. Pingaaruteqarporli app-it assigiinngitsut atorneqarsinnaasut ersarissumik oqaatigineqarnissaat. Alisissumit atuartitsisartut arlallit assersuutigalugu atuartut nutaaliorlutik arlaannik sanaartussatillugit iMovie atortarpaat. Allat Showbie-mik atuipput, taannalu atuartunut suliassanik nassiussinermut utertitsinermullu atorneqartarpoq.
- App-erpassuugamik aallartinnginnissinni eqqarsatigisassat aaku:
- Fagerisassinnut nittartakkullu atuartitsinissassinnut app-it sorliit atorneqarsinnaappat?
- Qanoq iliorlusi atuartitsinissinni app-it assiginngisitaartut atorsinnaavisigit?
- Alisissumit atuartitsisup sumiiffimmi ilinniartitsisoq app-it atugassat pillugit atuartunut ikiuussinnaanissaa anguniarlugu qanoq piareersarsinnaavaa?
Sumiiffiit ilaanni internetimut attaveqarniarneq ajornakusoorsinnaasarpoq. Tamanna eqqarsaatigalugu isuamassarsiatsialaavoq allamik pilersaaruteqarsinnaaneq. Tamannalu sumiiffimmi ilinniartitsisup nittartakkakkullu atuartitsisartup akornanni isumaqatigiissusiorfigineqassaaq. Ukua oqaluuserisinnaavasi:
- Internetimut attaveqanngikkutta qanoq iliorsinnaavugut?
- Qanoq iliussaagut taamaattoqarpat? Immitsinnut sianerfigaluta ataqatigiissaarissaagut?
- Sumiiffimmi ilinniartitsisup alisissumit atuartitsisumit ilitsersorneqarnikkut ikiorneqarnikkullu atuartisineq ingerlatissavaa?
Aasiannut Kitsissuarnullu alakkaaneq
Filmimi ataanut ikkunneqarsimasumi takuneqarsinnaavoq alisissumit atuartitsisartoq, Martha Nielsen, Aasianni atuarfimmit Kitsissuarsunni nunaqarfimmi atuarfimmut alisissumit atuartitsisoq.
